ऑनलाइन लोकमत
नाशिक, दि. 10- ज्या सरकारच्या राज्यात शेतकऱ्यांना आत्महत्या कराव्या लागतात, असं सरकार काय कामाचं? असा सवाल करत शिवसेना खासदार संजय राऊत यांनी मुख्यमंत्री देवेंद्र फडणवीस यांच्यावर टीका केली आहे. गेल्या तीन वर्षामध्ये साडेचार हजार शेतकऱ्यांनी आत्महत्या केल्या आहे. तरिही शेतकऱ्यांना कर्जमुक्ती का दिली जात नाही ? असा प्रश्नही संजय राऊत यांनी विचारला आहे. तसंच जुलै महिन्यात शिवसेना भूकंप करण्याच्या तयारीत असल्याचे संकेत संजय राऊत यांनी दिले आहेत.
शेतकऱ्यांच्या कर्जमुक्तीवरून आता शिवसेना आणि भाजप यांच्यातला लढा महाराष्ट्राला बघायला मिळणार आहे. नाशिकमधील शिवसेनेच्या संपर्क अभियानात संजय राऊत बोलत होते. आपली लढाई आता मित्रपक्षासोबत आहे, असंही संजय राऊत यांनी म्हंटलं आहे.
भाजपकडून शिवसेनेला संपवण्यासाठी अनेक चाली खेळल्या जात आहेत, पण तसं होणार नाही. जुलै महिन्यात आपल्या अस्तित्त्वासाठी आपण सर्वात मोठी लढाई लढणार आहोत. असं संजय राऊत यांनी स्पष्ट केलं आहे.
तसंच समृद्धी महामार्गावरूनही त्यांनी सरकारवर टीका केली आहे. समृद्धी महामार्गासाठी शेतकऱ्यांच्या जमिनी ओरबाडल्या जात आहेत. पण समृद्धी महामार्ग होऊ देणार नाही, असा शब्द शिवसेना पक्षप्रमुख उद्धव ठाकरे यांनी दिला आहे, अशी माहितीही संजय राऊत यांनी दिली आहे. तसंच शिवसेनेला कर्जमाफी नको तर सरसकट कर्जमुक्ती हवी आहे, त्यामुळे शिवसेना शेतकऱ्यांच्या पाठिशी ठामपणे उभी राहणार आहे, असंही या कार्यक्रमात संजय राऊत यांनी ठणकावून सांगितलं आहे.
मुख्यमंत्र्यांनी कर्जमाफीसंदर्भात जी उच्चाधिकार समिती नेमली आहे त्यात दिवाकर रावते सहभागी होणार आहेत. या बैठकीत सहभागी होऊन ते शिवसेनेची भूमिका ठामपणे मांडतील, असं संजय राऊत यांनी स्पष्ट केलं आहे. जुलै महिन्यात उद्धव ठाकरेंच्या नेतृत्त्वाखाली महाराष्ट्रात शिवसेनेचे मोठे आंदोलन होणार आहे. असं संजय राऊत यांनी स्पष्ट केलं आहे.
नाशिकच्या शिवसेना पदाधिकाऱ्यांनाही संजय राऊत यांनी झापलं असल्याची माहिती मिळते आहे. नाशिकमध्ये झालेल्या शेतकऱ्यांच्या आंदोलनात शिवसेनेचे किती पदाधिकारी होते? तुम्ही पदाधिकारी म्हणून मिरवता आहात का? या प्रश्नाचं उत्तर उद्धव ठाकरेंना द्यायची तयारी ठेवा असंही संजय राऊत सेना पदाधिकाऱ्यांना खडसावून सांगितल्याचं बोललं जात आहे.
येत्या जुलैमध्ये शिवसेनेकडून नेमका काय भूकंप होतो, हे पाहणं महत्त्वाचं ठरणार आहे.