प्रविण मरगळे
मुंबई - आगामी स्थानिक स्वराज्य संस्थांच्या निवडणुका डोळ्यासमोर ठेवून सत्ताधारी पक्षात पक्षप्रवेशाची रिघ लागली आहे. उपमुख्यमंत्री एकनाथ शिंदे यांच्याकडून उद्धवसेनेसह इतर पक्षांना खिंडार पाडले जात आहे. शिंदेसेना आपली ताकद वाढवत असल्याचे पाहून भाजपानेही नवा डाव टाकला आहे. भाजपाच्या या खेळीने विरोधकच नव्हे तर महायुतीतील घटक पक्ष असलेल्या शिंदेसेनेलाही डोईजड जाणार आहे. पश्चिम महाराष्ट्रात भाजपा एकनाथ शिंदे यांच्या शिलेदाराविरोधात विरोधकांना बळ देतेय का असा प्रश्न निर्माण झाला आहे.
सातारा जिल्ह्यातील पाटण मतदारसंघातील सत्यजित पाटणकर आणि त्यांच्या समर्थकांनी भारतीय जनता पार्टीत प्रवेश केला आहे. पाटणकर कुटुंब कित्येक वर्ष शरद पवारांच्या राष्ट्रवादीसोबत काम करत होते. या मतदारसंघात शंभूराज देसाई आणि पाटणकर हे कट्टर राजकीय विरोधक आहेत. अनेक निवडणुकीत पाटणकर-देसाई असा संघर्ष तिथल्या जनतेने पाहिला आहे. त्यातच सत्यजित पाटणकर यांना पक्षात घेऊन भाजपाने त्यांना बळ देण्याचं काम केले आहे. मुंबईत सत्यजित पाटणकर यांचा पक्षप्रवेश सोहळा पार पडला. यावेळी साताऱ्याचे खासदार उदयनराजे भोसले, जिल्हाध्यक्ष आमदार अतुल भोसले उपस्थित होते.
शरद पवारांचे निष्ठावंत पाईक म्हणून माजी मंत्री विक्रमसिंह पाटणकर यांची ओळख आहे. पवारांकडून नेहमीच पाटणकर कुटुंबाला ताकद देण्यात आली. सार्वजनिक बांधकाम मंत्री म्हणूनही काही काळ पाटणकरांनी काम केले. मात्र शंभूराज देसाई यांनी सलग तिसऱ्यांदा पाटणकर यांचा निवडणुकीत पराभव केला. त्यामुळे याच पाटणकरांना पक्षात घेऊन भाजपा सातारा जिल्ह्यात ताकद वाढवण्याचा प्रयत्न करत आहे.
साताऱ्याप्रमाणे सांगली जिल्ह्यातही एकनाथ शिंदे यांच्या शिवसेनेचे आमदार सुहास बाबर यांच्या मतदारसंघातही राजकीय उलथापालथ झाली आहे. या मतदारसंघात माजी आमदार सदाशिवराव पाटील आणि वैभव पाटील हेदेखील भाजपात प्रवेश करत आहेत. विट्याचे माजी नगराध्यक्ष असलेले वैभव पाटील अजित पवारांच्या राष्ट्रवादी पक्षाचे जिल्हाध्यक्ष होते परंतु निवडणुकीत महायुतीकडून तिकीट न मिळाल्याने त्यांनी अजित पवारांच्या राष्ट्रवादीला रामराम करत शरद पवारांच्या राष्ट्रवादीत प्रवेश केला. महाविकास आघाडीकडून त्यांनी निवडणूक लढवली. खानापूर मतदारसंघात विद्यमान आमदार सुहास बाबर आहे. दिवंगत अनिल बाबर यांचे ते चिरंजीव आहेत. या मतदारसंघातही बाबर विरुद्ध पाटील असा संघर्ष कित्येक वर्षाचा आहे. इथेही भाजपानेही वैभव पाटील यांना पक्षात आणत ताकद वाढवण्याचा प्रयत्न केला आहे.