ऑनलाइन लोकमत
ठाणे, दि. 2 - आपल्याकडे विशेष शक्ती असून कॅन्सरसारखा दुर्धर आजार बरा करु शकतो असा दावा करणा-या एका ढोंगीबाबाविरोधात ठाणे पोलिसांनी गुन्हा दाखल केला आहे. एका 37 वर्षीय महिलेच्या तक्रारीवरुन पोलिसांनी साईलाल हीरालालजी जेठीया विरोधात गुन्हा दाखल केला आहे. पीडित महिलेने साईलालवर लैंगिक शोषणाचा आणि तीन लाख रुपयांना फसवणूक केल्याचा आरोप केला आहे.
मूळचा गुवहाटीच्या असणा-या साईलाल जेठीयाची 2015 मध्ये पीडित महिलेबरोबर ओळख झाली. साईबाबांची शक्ती आपल्या अंगात असून कॅन्सर रुग्णांना आपण बरे करु शकतो या त्याच्या दाव्यावर महिलेचा विश्वास बसला. पीडित महिलेचे वडिल कॅन्सरने ग्रस्त असल्याने ती सहज त्याच्या जाळयात ओढली गेली. कॅन्सर बरा करण्यासाठी काही विधी करावे लागतील असे सांगून त्याने महिलेकडून 3 लाख रुपये उकळले.
कहर तर तेव्हा झाला जेव्हा ढोंगी साईलाल जेठीयाने पीडित महिलेला ती त्याची गतजन्मातली पत्नी असल्याचे पटवून दिले व तिच्याबरोबर शरीरसंबंध ठेवायला सुरुवात केली. ढोंगी बाबाच्या गोंड बोलण्यामध्ये फसलेली ही महिला त्याच्यासोबत आसाम, दिल्लीपर्यंत जाऊन आली. तिथे वेगवेगळया हॉटेलमध्ये आरोपीने या महिलेवर बलात्कार केला. जेव्हा पीडित महिलेने शरीरसंबंधाला विरोध सुरु केला तेव्हा साईलाल जेठीयाने या शरीरसंबंधांचे व्हिडीओ सोशल साईटसवर अपलोड करण्याची धमकी तिला दिली.
हा ढोंगी बाबा दोनवर्ष तिच्यावर अत्याचार करत होता. जेव्हा त्याचे अत्याचार सहन करण्यापलीकडे गेले तेव्हा पीडित महिलेने हिम्मत एकवटून पोलीस स्टेशन गाठले व तक्रार नोंदवली. पोलिसांनी आरोपी साईलाल जेठीया विरोधात बलात्कार (376), फसवणूक (420), 506 (गुन्हेगारी कट) अशा विविध कलमांखाली गुन्हा नोंदवला आहे. सध्या साईलाल जेठीया फरार असून पोलीस त्याचा शोध घेत आहेत.