ऑनलाइन लोकमत
मुंबई, दि. १६ - सुसंस्कृतांचे राज्य अशी ओळख मिरवणारा महाराष्ट्र बलात्कार व विनयभंगाच्या घटनांमध्ये अव्वल स्थानावर असल्याची माहिती समोर आली आहे. गेल्या वर्षांत महाराष्ट्रात विनयभंग व बलात्काराच्या सर्वाधिक तक्रारी दाखल झाल्याचे महिला व बालविकास मंत्री मनेका गांधी यांनी लोकसभेत सांगितले.
देशातील महिलांवरील अत्याचाराची माहिती देताना त्या बोलत होत्या. २०१४ साली महाराष्ट्रात बलात्कार व विनयभंगाच्या १३,८२७ तक्रारी नोंदवण्यात आल्या. त्यापाठोपाठ नंबर लागतो तो मध्य प्रदेशमध्ये १३, ३२३ तर आंध्र प्रदेशमध्ये १३,२६७ तक्रारी दाखल झाल्याचे गांधी यांनी सांगितले. महिलांवर होणा-या अत्याचाराच्या घटना दिवसेंदिवस वाढत असल्याची कबुली देतानाच महिलांच्या सुरक्षेला सरकारचे प्रथम प्राधान्य असल्याचेही त्यांनी स्पष्ट केले.