मद्यपान केलेल्या पांचोलीचा जुहूच्या पबमध्ये राडा

वादग्रस्त अभिनेता आदित्य पांचोली याने शनिवारी मध्यरात्री जुहूतल्या एका पबमध्ये राडा केला. पबमध्ये हिंदी गाणी वाजवा,

मुुंबई : वादग्रस्त अभिनेता आदित्य पांचोली याने शनिवारी मध्यरात्री जुहूतल्या एका पबमध्ये राडा केला. पबमध्ये हिंदी गाणी वाजवा, अशी मागणी करत त्याने डीजेला शिव्या हासडल्या. त्याला आवरण्याचा प्रयत्न करणाऱ्या बाऊन्सरच्या डोक्यात मोबाईल घालून त्याला जखमी केले. याप्रकरणी सांताक्रूझ पोलिसांनी पहाटे पाचच्या सुमारास आदित्यला त्याच्या राहत्या घरून अटक केली. सुटीकालिन न्यायालयाने त्याला जामीनावर सोडले.शनिवारी मध्यरात्री एकच्या सुमारास सी प्रीन्सेस हॉटेलमधील ट्रायोलॉजी पबमध्ये आदित्य दोन मित्रांसोबत आला. पबमध्ये पाऊल ठेवले तेव्हाच तो नशेत होता. याच नशेत तो पबमधील डीजेकडे गेला. इंग्लिश गाण्यांऐवजी हिंदी गाणी वाजव, अशी मागणी आदित्यने केली. डीजेने ही मागणी नाकारताच त्याने डीजेशी हुज्जत घातली आणि शिवीगाळ केली. रागाच्या भरात आदित्यने पबमध्ये तोडफोडही करण्याचा प्रयत्न केला. वातावरण शांत व्हावे म्हणून पबचे बाऊन्सर मंदार पाटोळे थझ (२९) आणि त्यांच्या सहकाऱ्यांनी पांचोलीला आवरण्याचा प्रयत्न केला. आदित्यने त्यांनाही शिवीगाळ सुरू केली. पाटोळे आदित्यला पबबाहेर घेऊन जाऊ लागले. तेव्हा आदित्यने आपल्या हातातला मोबाईल पाटोळेंच्या डोक्यात मारला.या हल्ल्यात पाटोळे जखमी झाले. त्यांच्या डोक्याला खोक पडली. पाच टाके पडलेल्या पाटोळे यांना पहाटे चारच्या सुमारास रूग्णालयातून डिस्चार्ज मिळाला. या घटनेनंतर आदित्य आणि त्याचे मित्र मात्र पबबाहेरून पसार झाले. आदित्यला पहाटे त्याच्या राहत्या घरातून अटक केली.