पिंपरी, दि. 12 - अध्यक्षांना वेळ नसल्याने पिंपरी-चिंचवड स्मार्ट सिटी लिमिटेडची पहिली सभा रद्द झाली. लवकरच कंपनीची सभा होणार असून नवीन सदस्यांना सामावून घेणे, कंपनी सचिव नियुक्त करणे, कंपनी सील, पॅनसिटी आणि एरिया बेस प्रकल्पांसाठी सल्लागार नियुक्तीचा विषय यावर चर्चा होणार असल्याचे प्रशासकीय सूत्रांनी सांगितले.
पंतप्रधान नरेंद्र मोदी यांनी शहराच्या विकाससाठी देश पातळीवरील शंभर शहरांचा स्मार्ट सिटी अंतर्गत विकास करण्याचे नियोजन केले होते. त्यानुसार स्पर्धाही घेण्यात आली. मात्र, गुणवत्ता असतानाही स्मार्ट सिटीत समावेश झाला नव्हता. त्यामुळे पहिल्या आणि दुसºया यादीत शहरावर अन्याय झाला होता. दरम्यान पुणे मेट्रोच्या कार्यक्रमात महापालिका निवडणुकीच्या पार्श्वभूमीवर भाजपाने पिंपरी-चिंचवडचा समावेश करू, असे आश्वासन दिले होते. महापालिका निवडणुकीनंतर या संदर्भात प्रस्ताव पाठविण्यात आला. त्यास मंजुरी मिळाली. त्यानंतर एसपीव्हीची स्थापना करण्यात आली.
तसेच प्रशासनाने पॅनसिटी, एरिया बेस डेव्हलपमेंटचे नियोजन करण्यात आले. कंपनी स्थापनेनंतर पहिली बैठक, सभा महापालिकेतील मुख्य भवनात सभा शनिवारी सकाळी ११ला होणार होती. या बैठकीच्या अध्यक्षस्थानी नगरविकास विभागाचे प्रधान सचिव डॉ. नितीन करीर असणार होते. तसेच या बैठकीस संचालक मंडळातील सदस्य महापौर नितीन काळजे, आयुक्त श्रावण हर्डीकर, सभागृह नेते एकनाथ पवार, स्थायी समिती सभापती सीमा सावळे, विरोधी पक्षनेते योगेश बहल, विभागीय आयुक्त चंद्रकांत दळवी, पालिका आयुक्त श्रावण हर्डीकर, पोलीस आयुक्त रश्मी शुक्ला, पीएमपीचे अध्यक्ष तुकाराम मुंढे, केंद्रीय गृहनिर्माण विभागाचे सहसचिव आर. एस. सिंग उपस्थित राहणार होते. तसेच या वेळी शिवसेनेचे नगरसेवक प्रमोद कुटे आणि मनसेचे सचिन चिखले यांची संचालक म्हणून निवड झाल्यानंतर त्यांचा कंपनीत समावेश करण्यात येणार होता. पहिल्या बैठकीस अध्यक्ष उपस्थित राहणे आवश्यक असते. कंपनी कायद्यानुसार सभेचे कामकाज चालविण्यात येते. मात्र, अध्यक्ष अनुस्थित राहिले होते. मुख्यमंत्र्यांचा दौरा आणि महत्त्वाचे काम असल्याने अध्यक्ष उपस्थित राहू शकत नाहीत, असे कळविल्याने नियोजित सभा रद्द करण्यात आली.
याबाबत आयुक्त श्रावण हर्डीकर म्हणाले, ‘‘स्मार्ट सिटी कंपनीची पहिली बैठक आज होणार होती. मात्र, अध्यक्षांना ऐनवेळी महत्वाचे काम असल्याचे त्यांनी कळविले होते. तसेच सर्व सदस्यांनाही याबाबतची माहिती देण्यात आली त्यामुळे नियोजित बैठक रद्द केली आहे. लवकरच ही बैठक घेण्यासाठी नियोजन केले जाईल.’’