Parliament Winter Session 2023:संसदेचे हिवाळी अधिवेशन सुरू आहे. लोकसभेचे कामकाज सुरू असताना अचानक प्रेक्षक गॅलरीमधून दोन जणांनी सभागृहात उडी मारली. या दोघांनी सभागृहातील बेंचवर उड्या मारून गोंधळ घातला. सभागृहात स्मोक कँडल पेटवल्या. या दोघांनाही पकडण्यात यश आले असून, चौकशीदरम्यान काही महत्त्वाच्या गोष्टी समोर येत आहेत. यावरून आता राजकीय वर्तुळातून प्रतिक्रिया येत आहेत. राष्ट्रवादी काँग्रेसचे ज्येष्ठ नेते एकनाथ खडसे यांनी एक्सवर एक पोस्ट करत या घटनेवर भाष्य केले आहे.
सन २००१ मध्ये संसदेवर हल्ला झाला होता. या घटनेला २२ वर्ष झाली असून, यानिमित्ताने शहिदांना श्रद्धांजली वाहण्यात येत आहे. याच दिवशी सुरक्षेत एवढी मोठी चूक झाल्याने आश्चर्य व्यक्त केले जात आहे. नहीं चलेगी नहीं चलेगी.. तानाशाही नहीं चलेगी... अशी घोषणाबाजी करत संसद सभागृहात आणि संसदेच्या बाहेरही युवकांनी आपला रोष व्यक्त केला. लोकसभा सभागृहात गोंधळ घालणाऱ्या तरुणाला खासदारांनी पकडले आणि चांगला चोप दिला. यानंतर त्याला सुरक्षा यंत्रणांकडे सोपवण्यात आले. सभागृहात गोंधळ घालणाऱ्या तरुणासह संसदेच्या परिसरातून एक महिला आणि एका पुरुषाला अटक करण्यात आली आहे. यावर आता एकनाथ खडसे यांनी भाष्य केले आहे.
संसदच सुरक्षित नसेल तर मग इतरत्र काय?
संसदेवरील दहशतवादी हल्ल्याला आज २२ वर्षे पूर्ण होत असतांना आजच्याच दिवशी लोकसभेच्या सभागृहात प्रेक्षक गॅलरीतून दोन युवकांनी सभागृहात उडी मारली. ही घटना संसदेच्या सुरक्षेवर प्रश्नचिन्ह निर्माण करणारी आहे. गुप्तचर यंत्रणा, सुरक्षा व्यवस्थेचे हे अपयश आहे. संसदेची सरक्षा व्यवस्था कशी कोलमडली आहे? याचे हे द्योतक आहे. केंद्रीय गृहमंत्र्यांनी या घटनेची गंभीर दखल घ्यावी. जर संसदच सुरक्षित नसेल तर मग इतरत्र काय? अशी विचारणा एकनाथ खडसे यांनी केली आहे.
दरम्यान, दोन्ही आरोपींनी कर्नाटकचे खासदार प्रताप सिम्हा यांच्या संदर्भाने बनवलेल्या व्हिजिटर पासद्वारे संसदेत प्रवेश केल्याचे वृत्त आहे. संसदेच्या कामकाजादरम्यान घुसलेल्या दोघांपैकी एकाचे नाव सागर असे आहे. त्याच्या दोन साथीदारांना संसदेबाहेर पकडण्यात आले. म्हणजे एकूण चार जण होते. ज्यांची चौकशी सुरू आहे.