MPSC Data Leak: अवघ्या काही दिवसांवर येऊन MPSC ची पूर्व परीक्षा ठेपली आहे. मात्र, यातच ही परीक्षा देणाऱ्या लाखो विद्यार्थ्यांचा डेटा लिक झाल्याची धक्कादायक माहिती समोर आली आणि विद्यार्थ्यांमध्ये एकच खळबळ उडाली. सोशल मीडियावरील इन्स्टाग्राम चॅनलवर माहिती लिक झाल्याचा दावा करण्यात आला. या चॅनलवरील एका ग्रुपमध्ये लाखो विद्यार्थ्यांची संवेदनशील माहिती लिक झाल्याचे सांगितले जात आहे. यातच मनसे प्रमुख राज ठाकरे यांचे पुत्र आणि विद्यार्थी सेनेचे अध्यक्ष अमित ठाकरे यांनी या प्रकारावरून MPSC वर टीका केली असून, चौकशीची मागणी केली आहे.
टेलिग्राम चॅनलवर सुमारे १ लाख विद्यार्थ्यांचे हॉल तिकिटाचा डेटा लिक झाला आहे. हा फक्त नमुना डेटा आहे. तसेच आमच्याकडे सर्व MPSC विद्यार्थ्यांची अनेक प्रकारची माहिती उपलब्ध आहे, असा दावा टेलिग्राम चॅनलवर तयार करण्यात आलेल्या ग्रुपवर करण्यात आला आहे. या माहितीमध्ये विद्यार्थ्यांचे ऑनलाइन पोर्टल लॉगिन, फी पावती, अपलोड केलेली कागदपत्रे, आधार कार्ड क्रमांक, दूरध्वनी क्रमांक, ईमेल आयडी ... आणि बरेच काही आहे. याशिवाय, पूर्व परीक्षेची प्रश्नपत्रिका २०२३ देखील उपलब्ध आहे, असा मोठा दावा या चॅनलवर करण्यात आला आहे. यानंतर एकच खळबळ उडाली. महाराष्ट्र लोकसेवा आयोगाने तातडीने दखल घेत, या सगळ्यावर खुलासाही जारी केला. मात्र, यावरून आता अमित ठाकरे यांनी टीका केली आहे.
'महाराष्ट्र पब्लिक शॉकिंग कमिशन' हीच ओळख सर्वांच्या मनात कायम होईल
अमित ठाकरे यांनी सोशल मीडियावर पोस्ट करून याबाबत भाष्य केले आहे. गेल्या काही वर्षांत एमपीएससीचा पेपर फुटला, परीक्षा केंद्रांवर गोंधळ, निकाल दिरंगाई अशा बातम्यांची महाराष्ट्राला सवय झाली; पण MPSC Data Leak प्रकरण धक्कादायक आहे. अवघ्या सात दिवसांवर आलेल्या महाराष्ट्र अराजपत्रित गट ब व गट क सेवा संयुक्त पूर्व परीक्षेला बसणाऱ्या विद्यार्थ्यांची प्रवेशपत्रं, आयोगाकडे असलेली विद्यार्थ्यांची सर्व माहिती तसंच प्रश्नपत्रिका आपल्याकडे असल्याचा दावा कुणी समाजमाध्यमांवर करत असेल तर हे खूपच गंभीर प्रकरण आहे. उच्चस्तरीय समिती नेमून या प्रकरणाची तत्काळ चौकशी व्हायला हवी. तसंच, आयोगाने नवीन प्रश्नपत्रिका काढून ही परीक्षा घ्यायला हवी. 'डेटा खूप मौल्यवान आहे' हे ओळखून यापुढे एमपीएससीची वेबसाईट हॅकर्सकडून हॅक होणार नाही किंवा डेटा लीक होणार नाही, यासाठी आयोगाने एथिकल हॅकर्स आणि आयटी-डेटा एक्सपर्ट्सच्या सहकार्याने सर्वतोपरी तांत्रिक दक्षता घ्यायला हवी आणि आपली विश्वासार्हता जपायला हवी. अन्यथा, विद्यार्थ्यांना वारंवार धक्के देणाऱ्या गलथान कारभारामुळे या आयोगाची 'महाराष्ट्र पब्लिक शॉकिंग कमिशन' हीच ओळख सर्वांच्या मनात कायम होईल, या शब्दांत अमित ठाकरे यांनी हल्लाबोल केला आहे.
दरम्यान, ३० एप्रिल २०२३ रोजी MPSCची पूर्व परीक्षा होणार आहे. मात्र, या व्हायरल झालेल्या माहितीनंतर विद्यार्थ्यांमध्ये एकच खळबळ उडाल्याचे सांगितले जात आहे. अशा पद्धतीने माहिती लिक होणे हा प्रशासनाचा ढिसाळ कारभार आहे. संबंधितांवर कडक कारवाई झाली पाहिजे, अशी मागणी राष्ट्रवादी युवक काँग्रेसकडून करण्यात आली आहे.
सर्व ठळक बातम्यांसाठी जरूर वाचा महाराष्ट्रातील अव्वल मराठी वेबसाईट "लोकमत डॉट कॉम"