कुत्र्याला ठार मारणाऱ्याला अटक

मोकाट फिरणाऱ्या कुत्र्याला केलेल्या बेदम मारहाणीत त्याचा मृत्यू झाला. या प्रकरणी गोरेगाव पोलिसांनी सोमवारी एकाला अटक केली आहे.

मुंबई : मोकाट फिरणाऱ्या कुत्र्याला केलेल्या बेदम मारहाणीत त्याचा मृत्यू झाला. या प्रकरणी गोरेगाव पोलिसांनी सोमवारी एकाला अटक केली आहे.किशन भागवत (३९) असे अटक करण्यात आलेल्या इसमाचे नाव आहे. जो गोरेगाव पश्चिमच्या जवाहरनगर परिसरात एका कन्स्ट्रक्शन साइटवर बिगारी काम करतो. सूत्रांनी दिलेल्या माहितीनुसार, भागवतने गेल्या आठवड्यात एका कुत्र्याला काठीने बदडून काढले. या मारहाणीत गंभीर जखमी झाल्याने कुत्र्याचा जागीच मृत्यू झाला. ही बाब स्थानिक प्राणीप्रेमींना समजली आणि त्यांनी या प्रकरणी गोरेगाव पोलिसात धाव घेतली. पोलिसांनी या प्रकरणी चौकशी करत सुरुवातीला अनोळखी इसमाविरुद्ध गुन्हा दाखल केला. त्यानंतर या प्राणीप्रेमींनी घटनास्थळाच्या आसपास असलेल्या सोसायटीतील लोकांच्या मदतीने या ठिकाणचे सीसीटीव्ही फुटेज मिळवले. जे पोलिसांना दिल्यानंतर त्यांनी त्याच्या मदतीने भागवतची माहिती मिळवली आणि सोमवारी त्याचा गाशा गुंडाळला. त्याला आणि त्याच्या मित्राला तो कुत्रा चावला होता. त्याच्या रागात त्याने ही मारहाण केल्याचे कबूल केले. मात्र त्याच्या अंगावर कुठेच कुत्रा चावल्याच्या जखमा नाहीत, तसेच कुत्रा आपल्यावर भुंकला किंवा आपल्याला चावला तर त्याला ठार मारणे हा उपाय नाही, असे प्राणीप्रेमींचे म्हणणे आहे. या प्रकरणी त्याला स्थानिक न्यायालयात हजर करण्यात आले. त्याला न्यायालयीन कोठडी सुनावण्यात आली असून अधिक चौकशी सुरू आहे. (प्रतिनिधी)