ऑनलाइन लोकमत
मुंबई, दि. २३ - जागावाटपावरुन शिवसेना - भाजप युतीमधील संबंध ताणलेले असतानाच शिवसेना पक्षप्रमुख उद्धव ठाकरे यांनी मंगळवारी पुन्हा एकदा भाजपला सणसणीत टोला लगावला आहे. राज्यात सत्ता आणण्यासाठी महायुतीचे घोडे उधळले असून त्यांना अडवणे अशक्य आहे. मात्र जोपर्यंत घोडे जमिनीवरुन चालत नाही तोपर्यंत त्याचा काडीचाही उपयोग नाही असा चिमटा उद्धव ठाकरे यांनी भाजपला काढला आहे. महायुतीचे कोडे सुटावे यासाठी माणसाने माणसासारखे वागावे असा सल्लाही त्यांनी दिला आहे.
शिवसेनेचे मुखपत्र असलेल्या सामनाच्या अग्रलेखातून पक्षप्रमुख उद्धव ठाकरे यांनी युतीवरुन प्रसारमाध्यमांवर टीकास्त्र सोडतानाच भाजपला चिमटा काढला आहे. युती तुटणार की राहणार यावर सट्टा लावला जात आहे. यात प्रसारमाध्यमंही सामील झाल्याचे दिसत असून प्रसारमाध्यमांनी युतीपुढे प्रश्नचिन्ह टाकून गोंधळात भर टाकली आहे अशी टीका उद्धव ठाकरे यांनी केली आहे. माणूस कुत्र्याला चावला ही बातमी होते. त्याचपद्धतीने युती तुटली हीच बातमी होऊ शकते असे प्रसारमाध्यमांना वाटते. त्यामुळे युती तुटावी असे डोहाळे जेवण काही मंडळींनी घातले आहे असा टोलाही ठाकरेंनी लगावला आहे. महायुतीचे कोडे लवकर सुटणे गरजेचे आहे व त्यासाठी माणसाने माणसासारखेच वागावे असेही उद्धव ठाकरेंनी म्हटले आहे.