बदलापूर : बदलापूरमध्ये राजेश नेपाळी या तरुणाने केलेल्या हत्येमागील गूढ उकलले आहे. पोलिसांना विविध कारणे सांगून गुंतविण्याचा आरोपीचा प्रयत्न फसला असून, या हत्येमागे अनैतिक संबंध असल्याचे समोर आले आहेत. राजेश नेपाळीच्या पत्नीसोबत हत्या झालेल्या जगत शाहीचे अनैतिक संबंध होते, असे तपासात पुढे आले आहे. राजेश आणि जगत यांची ओळख नव्हती. मात्र पहिल्या भेटीतच जगत हा आपल्या पत्नीचा प्रियकर असून, त्यांचे अनैतिक संबंध असल्याचे कळताच रागाच्या भरात राजेशने त्याची हत्या केली. १५ मार्चला बदलापूरमधील कात्रप परिसरात धड आणि मुंडके वेगळे केलेला मृतदेह सापडला. या प्रकारानंतर राजेशला पोलिसांनी शिताफीने भुसावळ येथे अटक केली. अटकेनंतर राजेश पोलिसांना तपासात योग्य सहकार्य करत नव्हता. पोलिसांना संभ्रमात टाकण्याचा प्रयत्न करत होता. त्यामुळे ही हत्या समलैंगिक संबंधातून घडली असावी या दिशेने पोलिसांनी तपास सुरू केला असता राजेशने हे कारण नसल्याचे स्पष्ट केले. त्यानंतर राजेशने खरे कारण सांगितले. त्याला गावाला जायचे असल्याने ढाब्याच्या मालकांनी पर्यायी कूकची सोय करण्यास राजेशला सांगितले होते. त्यानुसार एका वेटरच्या ओळखीतून राजेश आणि जगत यांची ओळख करून देण्यात आली. पहिल्याच भेटीत ते दोघे दुकानातच दारू पिण्यासाठी बसले होते. दारू प्यायल्यावर जगतने नेपाळमधील आपल्या अनैतिक संबंधाची माहिती राजेशला देण्यास सुरुवात केली. मात्र, ज्या महिलेसोबत अनैतिक संबंध होते ती राजेशचीच पत्नी असल्याचे समजताच आपले बाळही जगतचे असल्याचा संशय आला. हत्येनंतर दुकानातून राजेश गायब झाला. पोलिसांनी नेपाळच्या दिशेने जाणाऱ्या रेल्वेतून ताब्यात घेतले. (प्रतिनिधी)
हत्या झालेला जगत निघाला प्रियकर
By admin | Updated: March 22, 2017 02:18 IST