स्थानिकांमध्ये होणार चढाओढ

दिघीचा काही भाग आणि भोसरीतील अधिक भाग असा मिळून प्रभाग क्रमांक पाच तयार झाला आहे.

पिंपरी : दिघीचा काही भाग आणि भोसरीतील अधिक भाग असा मिळून प्रभाग क्रमांक पाच तयार झाला आहे. सामान्य आणि मध्यमवर्गीयांची संख्या या प्रभागात अधिक आहे. या प्रभागात एक जागा ओबीसी आणि उर्वरित तीन जागा या सर्वसाधारण गटासाठी राखीव असल्याने स्थानिकांमध्ये उमेदवारीसाठी सर्वपक्षांत चढाओढ लागणार आहे. महापालिकेच्या गेल्या निवडणुकीतील प्रभाग क्रमांक ३२ सँडविक कॉलनी आणि प्रभाग ३३ गवळीनगर अशा दोन प्रभागांचा समावेश यंदाच्या प्रभाग क्रमांक पाचमध्ये झाला आहे. दोन प्रभाग आणि दिघीचा काही भाग या प्रभागात समाविष्ट झाला आहे. एका बाजूने लष्करी हद्द आहे. भोसरी आळंदी रस्ता, भोसरीचा भाग असणारा हा परिसर, प्रभाग पुणे-नाशिक रस्त्याने तोडला गेला आहे. भोसरीतून दिघीला जाणाऱ्या जुन्या रस्त्याने सॅन्डविक कॉलनी प्रभाग आणि दिघीचाही काही भाग तोडला आहे.पुणे-नाशिक रस्त्याने भोसरीतून दिघी रस्त्याने हिंगे शॉपिंग, एमएम लॅडमार्कपासून पुढे लष्करीहद्दीपर्यंत आणि तेथून पुढे पंचशील बुध्दविहार, पांडूरंग रोकडे यांची मिळकत, दिघी गावच्या सीमेने विकास सेल्स, जगताप आणि शितोळे यांची मिळतीपासून भोसरी आळंदी रस्त्यास हा भाग जोडला आहे. भोसरी आळंदी रस्त्याने मयूरी पॅलेस, संत ज्ञानेश्वर महाराज विद्यालय, गुलाब हाके यांची मिळकत, रूपाली लेडीज टेलरपासून रघुनंदन बिल्डिंगपासून सुवर्णा हॉटेल, छत्रपती शिवाजी महाराज शाळेपासून पुणे नाशिक रस्त्यास हा प्रभाग जोडला आहे. जुन्या दोन प्रभागांची मोडतोड करून हा प्रभाग तयार केला आहे. गत निवडणुकीत सॅन्डविक कॉलनी प्रभागातून राष्ट्रवादीकडून माजी महापौर मोहीनी लांडे, माजी स्थायी समिती सभापती अजित गव्हाणे, तसेच गवळीनगर प्रभागातून काँग्रेसचे जालिंदर उर्फ बापू शिंदे, अनुराधा गोफणे हे निवडून आले होते. या प्रभागातील बहुतांश परिसर हा नागरी वसाहतींची असल्याने अनिधिकृत बांधकामे, वाढीव बांधकामांचा प्रमुख प्रश्नआहे. उपलब्ध आरक्षणानुसार विद्यमान चारही नगरसेवकांना संधी आहे. दोन वेगवेगळ्या प्रभागातून उभे राहिले. भोसरीच्या राजकारणावर माजी आमदार विलास लांडे यांचे वर्चस्व राहिले आहे. मात्र, पूर्वाश्रमीचे लांडे यांचे शिष्य आमदार महेश लांडगे भाजपाच्या वाटेवर आहेत. त्यामुळे लांडे आणि लांडगे गटात वर्चस्ववादासाठी कमालीची चुरस होणार आहे. या प्रभागात गेल्यावेळी दोन जागा काँग्रेसला मिळाल्या होत्या. तर दोन जागा या राष्ट्रवादी काँग्रेसला मिळाल्या होत्या. त्यामुळे राष्ट्रवादी काँग्रेस, काँग्रेस, भारतीय जनता पक्ष, शिवसेना अशा सर्वच पक्षांत उमेदवारीसाठी चुरस असणार आहे. लढतही रंगतदार असणार आहे. गेल्यावेळी काँगे्रसच्या तिकीटावर निवडून आलेले जालिंदर शिंदे आणि अनुराधा गोफणे यावेळी कोणत्या पक्षाकडून निवडणूक लढवितात. याबाबतही भोसरी परिसरात कमालीची उत्सुकता आहे. तसेच भाजपा आणि शिवसेनेची युती होणार का, यावरही या प्रभागात कोण निवडूण येणार आहे, हे ठरेल.(प्रतिनिधी)>समाविष्ट भाग : रामनगर, तुकारामनगर, गुरूदत्त कॉलनी, गंगोत्री पार्क, सावंतनगर, महादेवनगर, गवळीनगर, श्रीराम कॉलनी, ज्ञानेश्वर नगर, चक्रपाणी वसाहत आदी इत्यादी भाग समाविष्ट आहे.