पराभवानंतर राज्यात काँग्रेसमध्ये 'कामराज प्लॅन'

लोकसभा निवडणुकीत राज्यात काँग्रेसच्या निराशाजनक कामगिरीनंतर सोनिया गांधी यांनी राज्यात काँग्रेसमध्ये 'कामराज प्लॅन' राबवण्याचा निर्णय घेतला आहे.

 ऑनलाइन टीम

नवी दिल्ली, दि. ३० - लोकसभा निवडणुकीत महाराष्ट्रात काँग्रेसच्या दारुण पराभवानंतर काँग्रेस अध्यक्ष सोनिया गांधी यांनी राज्यात 'कामराज प्लॅन' राबवण्याचा निर्णय घेतला आहे. यानुसार मंत्रिमंडळातील चार विद्यमान मंत्र्यांना मंत्रिमंडळातून वगळून त्यांना पक्षात सक्रीय करण्यात येईल. तर पक्षातील तीन तडफदार पदाधिका-यांना मंत्रिमंडळात स्थान देऊन पक्षात नव्याने उत्साह आणण्याचे प्रयत्न केले जाणार आहेत.

लोकसभा निवडणुकीतील राज्यातील कामगिरीसंदर्भात शुक्रवारी काँग्रेस अध्यक्ष सोनिया गांधी, राज्याचे मुख्यमंत्री पृथ्वीराज चव्हाण, प्रदेशाध्यक्ष माणिकराव ठाकरे यांची एक बैठक पार पडली. या बैठकीत सोनिया गांधींनी राज्यात मंत्र्यांच्या मतदारसंघातील काँग्रेसच्या कामगिरीवर तीव्र नाराजी व्यक्त केल्याचे वृत्त आहे. राज्यात काँग्रेसला अवघ्या दोन जागांवर विजय मिळाला असून बहुसंख्य मंत्र्यांच्या मतदारसंघात काँग्रेस पिछाडीवर गेली होती.

काय आहे कामराज प्लॅन

१९६३ मध्ये काँग्रेस नेते व तत्कालीन मद्रासचे मुख्यमंत्री के. कामराज यांनी एक नवीन संकल्पना राबवली होती. त्यावेळी काँग्रेसची लोकप्रियता घटत असल्याचे लक्षात आल्यावर कामराज यांनी एक तोडगा काढला होता. यानुसार काँग्रेसच्या सर्व ज्येष्ठ नेत्यांनी त्यांच्या मंत्रिपदाचा राजीनामा देऊन पक्षात सक्रीय व्हायचे. यामुळे पक्षाला नवसंजीवनी मिळू शकेल असे कामराज यांचे म्हणणे होते. कामराज यांच्या सूचनेनंतर लालूबहादूर शास्त्री, जगजीवन राम, मोरारजी देसाई, एस.के.पाटील या सारख्या ज्येष्ट नेत्यांनी त्यांच्या मंत्रिपदाचा राजीनामा देऊन पक्षकार्यात सक्रीय झाले होते. कामराज यांची ही संकल्पना भारतीय राजकारणात कामराज प्लॅन म्हणून ओळखली जाते.