डॅशिंग अधिकाऱ्याची प्रत्येक ठिकाणी छाप

चॉर्टर्ड अकाउंटंटची (सीए) पहिल्या श्रेणीतील पदवी असतानाही मुद्दामहून आयपीएस सेवेत दाखल झालेल्या हिमांशू रॉय यांच्या तीन दशकांच्या धवल कारर्किदीचा शेवट पोलीस वर्तुळाला चटका लावणारा ठरला.

जमीर काझीमुंबई : चॉर्टर्ड अकाउंटंटची (सीए) पहिल्या श्रेणीतील पदवी असतानाही मुद्दामहून आयपीएस सेवेत दाखल झालेल्या हिमांशू रॉय यांच्या तीन दशकांच्या धवल कारर्किदीचा शेवट पोलीस वर्तुळाला चटका लावणारा ठरला. परिवेक्षणार्थी अधीक्षकापासून ते दहशतवादविरोधी पथकाच्या (एटीएस) प्रमुख पदापर्यंतच्या प्रत्येक पोस्टिंगवर त्यांनी स्वत:ची आगळी छाप निर्माण केली. मात्र हा जिंदादिल अधिकारी कर्करोगाची लढाई लढण्यात अपयशी ठरला.२३ जून १९६३ रोजी जन्मलेल्या हिमांशू रॉय यांनी वाणिज्य शाखेची पदवी घेतल्यानंतर सीएची परीक्षा ते पहिल्या श्रेणीत उत्तीर्ण झाले. मात्र पोलीस दलाचे आकर्षण असल्याने त्यांनी केंद्रीय स्पर्धा परीक्षेवर लक्ष केंद्रित केले आणि ते १९८८च्या आयपीएस बॅचचे अधिकारी बनले. सहा फुटांहूनही अधिक उंची व त्याला साजेशी शरीरयष्टी असलेल्या हिमांशू यांचे व्यक्तिमत्त्व चित्रपटातील नायकासारखेच होते. पहिल्या भेटीतच त्यांची समोरच्यावर छाप पडत असे. गडचिरोलीनंतर नाशिक ग्रामीण, अहमदनगरचे पोलीस अधीक्षक म्हणून काम करीत असताना तेथील संघटित गुन्हेगारी त्यांनी मोडीत काढली होती. त्यानंतर त्यांनी मुंबईत परिमंडळ-१ व ८चे उपायुक्त म्हणून काम पाहिले. आर्थिक गुन्हा अन्वेषण शाखेत उपायुक्त असताना अनेक आर्थिक घोटाळे उघडकीस आणले. २००४ ते २००७ या कालावधीत नाशिकचे आयुक्त म्हणून काम करताना त्यांना वैयक्तिक आरोपांनाही सामोरे जावे लागले. मात्र त्याचा कामावर काहीही परिणाम त्यांनी होऊ दिला नाही. तेथून मुंबई पोलीस दलात कायदा व सुव्यवस्थेच्या पदावर त्यांना बढती मिळाली. तेव्हा अनेकांच्या भुवया उंचावल्या. महानगरातील कायदा व सुव्यवस्था सुरळीत पार पाडल्यानंतर त्यांच्यावर ‘क्राइम’ची जबाबदारी सोपविली. या शाखेचे तत्कालीन प्रमुख राकेश मारिया यांनी आगळा ठसा उमटविल्याने रॉय यांना स्वतंत्र ओळख निर्माण करणे आव्हानात्मक होते. घटनेचा सर्व दृष्टीने विचार करणे, गुन्ह्यांतील बारकावे आणि तत्काळ निर्णय घेण्याच्या त्यांच्या पद्धतीमुळे त्यांनी ‘क्राइम’मध्ये तोडीस तोडअसे काम करून दाखविले. एटीएसचे प्रमुख म्हणूनही त्यांनी दीड वर्ष जबाबदारी सांभाळली. चार वर्षांपूर्वी त्यांचा कर्करोग बळावला. त्यामुळे तुलनेत साईड पोस्टिंग समजल्या जाणाºया पोलीस गृहनिर्माण व कल्याण विभाग तसेच मुख्यालयात नियुक्ती घेतली. मात्र उपचारासाठी परदेशात जावे लागत असल्याने ते नोव्हेंबर २०१६पासून आजारपणाच्या रजेवर गेले.