घोलप, हळवणकरांची आमदारकी धोक्यात

न्यायालयाने शिक्षा सुनावलेले शिवसेनेचे देवळाली येथील आमदार बबन घोलप आणि इचलकरंजीचे भाजपा आमदार सुरेश हळवणकर यांची आमदारकी धोक्यात आली

मुंबई : न्यायालयाने शिक्षा सुनावलेले शिवसेनेचे देवळाली येथील आमदार बबन घोलप आणि इचलकरंजीचे भाजपा आमदार सुरेश हळवणकर यांची आमदारकी धोक्यात आली असून, त्यामुळे त्यांना ९ वर्षे कोणतीही निवडणूक लढता येणार नाही. दोघांचेही सदस्यत्व रद्द करावे, असे मत निवडणूक आयोगाने राज्यपालांना दिल्यामुळे राज्यपाल कुठल्याही क्षणी तसा आदेश काढू शकतात.विधिमंडळाचे प्रधान सचिव डॉ. अनंत कळसे यांनी सांगितले, की या दोघांचे सदस्यत्व रद्द करण्यासंदर्भातील प्रकरण महाधिवक्ता यांचे मत घेऊन विधिमंडळ सचिवालयाने राज्यपालांकडे पाठविले होते. राज्यपालांनी त्यावर निवडणूक आयोगाचे मत मागविले होते. दोघांचे सदस्यत्व घटनेच्या कलम १९१, १९२ नुसार रद्द करावे, असे मत आयोगाने दिले आहे. सदस्यत्व रद्द करण्यासंबंधीचा राज्यपालांचा आदेश येत्या एक-दोन दिवसांत येणे अपेक्षित आहे. भ्रष्टाचारमुक्त कारभाराची हमी देऊन राज्यात सत्तेत येऊ पाहात असलेल्या महायुतीला हा धक्का आहे. दोन्ही काँग्रेसला यानिमित्ताने युतीची कोंडी करण्याची संधी मिळेल. घोलपांचे काय आहे प्रकरण ?सेनेचे आमदार घोलपांवर बेहिशेबी मालमत्ता बाळगल्याप्रकरणी आरोप सिद्ध झाले होते. लाचलुचपत प्रतिबंधक कायद्याच्या विशेष न्यायालयाने त्यांना तीन वर्षे कैदेची शिक्षा सुनावली होती. त्यामुळे त्यांचे सदस्यत्व त्यांना ३ वर्षांची शिक्षा झाल्यापासून म्हणजे २० मार्च २०१४ पासून रद्द केले जाणार आहे. शिक्षेचा कालावधी पूर्ण केल्यानंतर सहा वर्षे म्हणजे मार्च २०२३ पर्यंत त्यांना निवडणूक लढता येणार नाही.हळवणकरांना वीजचोरी भोवली!हळवणकर यांचा कोरची (ता.हातकणंगले) येथे भागीदारीत यंत्रमाग कारखाना असून, तेथे वीजचोरी केल्याप्रकरणी इचलकरंजीच्या जिल्हा सत्र न्यायालयाने त्यांना तीन वर्षे कैदेची शिक्षा ३ मे २०१४ रोजी सुनावली होती. या विरुद्ध त्यांनी केलेले अपील दाखल करून घेताना उच्च न्यायालयाने त्यांच्या शिक्षेला स्थगिती दिली, मात्र त्यांना दोषी ठरविण्याचा निकाल स्थगित केलेला नाही. त्यांनाही २०२३ पर्यंत कोणतीही निवडणूक लढता येणार नाही.