मुुंबई : शहरात कालपासून पाच जणांच्या आत्महत्यांची नोंद विविध पोलीस ठाण्यांमध्ये झाली. आत्महत्या करणाऱ्यांमध्ये दोन महिलांचा समावेश आहे. या दोघींनी बहुमजली इमारतींवरून उडी मारून आत्महत्या केल्याचे पोलीस सांगतात. तर केईएम रूग्णालयात एका अनोळखी तरूणाचा मृतदेह आढळला आहे.अंधेरी येथील लोखंडवाला कॉम्प्लेक्समध्ये राहाणाऱ्या एकता बाबर (३५) या महिलेने रात्री बाराच्या सुमारास ग्रीन एकर्स इमारतीच्या १६व्या मजल्यावरून उडी मारून आत्महत्या केली. एकता यांच्या आईने पोलिसांना दिलेल्या जबाबानुसार त्या बॉलीवूडमध्ये कलाकार पुरविण्याचे काम करत होत्या. सहा महिन्यांपुर्वी त्यांच्या वडलांचे निधन झाले होते. तेव्हापासून त्या निराश आणि तणावग्रस्त बनल्या होत्या. ओशिवरा पोलिसांनी त्यांचा मृतदेह विच्छेदनासाठी कूपर रूग्णालयात धाडला आहे.मध्यरात्री दोनच्या सुमारास गावदेवी पोलीस ठाण्याच्या हद्दीतल्या वॉर्डन रोडवरील ओशियानिक इमारतीच्या सहाव्या मजल्यावरून बीना बजराणी (४४) यांनी आत्महत्या केली. गेल्या सात ते आठ वर्षांपासून बीना यांची मानसोपचारतज्ज्ञांकरवी उपचार सुरू होते. त्या एकाकी राहात असत, अशी माहिती वडील गुलाबराय यांनी गावदेवी पोलिसांना दिली. बीना यांनी ज्या घरातून उडी घेतली ते त्यांच्या आत्तेभावाचे आहे. गेल्या काही दिवसांपासून त्या येथे वास्तव्यास होत्या, अशी माहिती पोलीस देतात.वांद्रयाच्या शासकीय वसाहतीत राहाणाऱ्या कुणाल रामजी आंबवणेकर (२६) या तरूणाचा मृतदेह कुजलेल्या अवस्थेत सापडला. पोलिसांनी दिलेल्या माहितीनुसार कुणालचा मृतदेह गळफास घेतलेल्या अवस्थेत होता. चौकशीत आई-वडील नसलेला कुणाल शासकीय वासहतीत राहाणाऱ्या मावशीकडे वास्तव्यास होता. तो क्लिनर म्हणून काम करत होता. मावशी दोन दिवस घराबाहेर होती. ती परतली तेव्हा कुणालचा मृतदेह आढळला. या प्रकरणी खेरवाडी पोलिसांनी अपघाती मृत्यूची नोंद करून कुणालच्या आत्महत्येमागील कारणाचा शोध घेत आहेत.दारूच्या व्यसनावरून पत्नीसोबत झालेल्या भांडणानंतर नरसिंहा नरयप्पन नेत्रे (२६) या तरूणाने गळफास घेत आत्महत्या केली. काल रात्री आठच्या सुमारास विक्रोळीच्या टागोर नगरात ही घटना घडली. (प्रतिनिधी)
एकाच दिवसात शहरात पाच आत्महत्या
By admin | Updated: September 23, 2014 05:11 IST