राज्यात अवचित भारनियमनाचे संकट

कोळसा, गॅसचा तुटवडा : रत्नागिरी-सिंधुदुर्ग जिल्हे बचावलेरत्नागिरी : कोळसा व गॅसच्या पुरवठ्यातील तुटीमुळे महावितरणला रोज सुमारे दोन हजार मेगावॅट वीज कमी मिळत आहे. महानिर्मितीच्या औष्णिक प्रकल्पातून किमान ५५०० मेगावॅट वीज अपेक्षित असताना तेथून केवळ ४००० ते ४५०० मेगावॅट वीज मिळत आहे. त्यामुळे राज्यात भारनियमन सुरू करण्यात आले आहे. महानिर्मितीला दररोज किमान ३२ कोळशांचे रेक्स लागतात. परंतु प्रत्यक्षात फक्त १५ ते १६ रेक्स उपलब्ध होतात. सध्या खापरखेडा, पारस, भुसावळ या केंद्रात केवळ एक ते अर्ध्या दिवसांचा कोळसा शिल्लक राहिला आहे. चंद्रपूर महाऔष्णिक केंद्रात अडीच दिवसांचा कोळसा शिल्लक राहिला आहे. महानिर्मितीच्या सर्वच विद्युत केंद्रातील कोळशाची स्थिती बिकट असल्याने वीजनिर्मितीवर परिणाम झाला आहे. याशिवाय इंडिया बुल्सकडून कोळशा अभावी २७० मेगावॅट वीज कमी उपलब्ध होत आहे. कोळशाबरोबर गॅस उपलब्धतेच्या अडचणी भासत आहे. गॅस अभावी १९५० मेगावॅटचा रत्नागिरी गॅस प्रकल्प बंद आहे. उरण गॅस केंद्रात १५० मेगावॅट वीजनिर्मीती कमी झाली आहे. याशिवाय अदानी प्रकल्पातून २५०० मेगावॅट वीज अपेक्षित असताना गेल्या काही दिवसात तेथून वेगवेगळ्या कारणामुळे केवळ १५०० ते १७०० मेगावॅट वीज मिळत आहे. गेल्या १५ दिवसांपासून विजेच्या मागणी व पुरवठ्यात मेळ घालण्यात अडचणी निर्माण झाल्याने राज्यात भारनियमन सुरू करण्यात आले आहे. फिडर्सनिहाय भारनियमन करण्यात येत आहे. ड वर्गापासून पुढे भारनियमन करण्यात येत असल्यामुळे कोकण परिमंडलास मात्र दिलासा मिळाला आहे.राज्यात १५ दिवसापूर्वी विजेची मागणी १४,५०० ते १५,५०० मेगावॅट इतकी होती मात्र आता मागणीत वाढ झाली आहे. १६,५०० ते १६,८०० मेगावॅट इतकी वीजेची मागणी होत आहे. गतवर्षी याच दिवसात १२,२०० मेगावॅट इतकी मागणी होती, मात्र त्या तुलनेत सध्याची मागणी तब्बल ४,६०० मेगावॅअ इतकी वाढली आहे. विजेची वाढती मागणी पूर्ण करण्यासाठी महावितरणला केंद्रीय विद्युत एक्सचेंजमधून दररोज १,००० ते १,४०० मेगावॅट वीज घेतली जाते. याशिवाय पारदर्शक निविदा प्रक्रियेतून रोज ३०० मेगावॅट विजेची व्यवस्था करण्यात आली आहे. उरण गॅस केंद्राला बाजारातून गॅस उपलब्ध करून देण्यासाठीही महावितरण प्रयत्न करीत आहे, जेणेकरून १०० ते १५० मेगावॅट जादा वीज उपलब्ध होई शकते. (प्रतिनिधी)