चिंचोली ब. (जि. लातूर) : लातूर तालुक्यातील चिंचोली (ब.) येथील एक ८ वर्षीय बालक ११ फेब्रुवारी रोजी गायब झाला होता. १३ दिवसांनी अखेर त्याचा मृतदेहच आढळला आहे. याप्रकरणी गातेगाव पोलिसांत आकस्मात मृत्यूची नोंद करण्यात आली आहे. दरम्यान, आपल्या मुलाचा घातपात करण्यात आल्याचा आरोप आई- वडिलांनी केला आहे.
दीपक महादेव बंडे (८, रा. चिंचोली बल्लाळनाथ, ता. लातूर) असे मयत बालकाचे नाव आहे. चिंचोली ब. येथील दीपक बंडे हा बालक ११ फेब्रुवारी सकाळी ११ वा. च्या सुमारास घरातून बाहेर पडला होता. मात्र, तो सायंकाळपर्यंत घरी आलाच नाही. त्यामुळे कुटुंबियांनी शोध घेण्यास सुरुवात केली. मात्र, तो कुठेही आढळला नाही. त्यामुळे त्याची आई जयश्री बंडे यांनी गातेगाव पोलिस ठाणे गाठून १२ फेब्रुवारी रोजी मुलगा हरवल्याची तक्रार दिली होती. याप्रकरणी पोलिसांत अपहरणाचा गुन्हा दाखल करण्यात आला होता. पोलिसांनी शोध घेण्यास सुरुवात केली. परंतु, तो कुठेही सापडला नाही.
दरम्यान, शुक्रवारी सकाळी बंडे यांच्या शेतापासून जवळच असलेल्या एका विहिरीत दीपकचा मृतदेह आढळून आला. आई- वडिल व कुटुंबियांचा १३ दिवसांपासून शोध सुरु होता. मात्र, तो कोठेही आढळला नाही. मात्र, अचानक मृतदेह आढळल्याने माझ्या मुलाचा घातपात करण्यात आल्याचा आरोप माता- पित्याने केला आहे. याप्रकरणी गातेगाव पोलिसांत आकस्मात मृत्यूची नोंद करण्यात आली असल्याची माहिती बीट अंमलदार शिरीष पाटील यांनी दिली.