उदगीर : स्वत:च्या लग्नपत्रिका नातेवाईकांना देण्यासाठी निघालेल्या नवरेदवासह चुलत भावाचा अपघातात मृत्यू झाल्याची घटना बुधवारी दुपारी १२:२० वाजेच्या सुमारास लोहारा येथील दुध डेअरीसमोर घडली. आकाश धोंडिबा निलेवाड (वय २५), विशाल भिवा निलेवाड (वय २२) असे मयत युवकांची नावे आहेत.
उदगीर तालुक्यातील अनुपवाडी येथील विशाल भिवा निलेवाड यांचे १८ एप्रिल रोजी लग्न होते. त्यामुळे ते आपला चुलत भाऊ आकाश धोंडीबा निलेवाड याच्यासोबत लग्नपत्रिका वाटप करण्यासाठी बुधवारी दुचाकी क्रमांक (एम.एच. २४ बी.क्यू. ५८५३) वर उदगीरहून नळेगाव रोडकडे निघाले होते. त्यांची दुचाकी लोहारा गावाजवळील मराठवाडा दूध संकलन केंद्रासमोर आली असता कार क्रमांक (एम.एच. १२ एन.ई. ९१५३)ने त्यांच्या दुचाकीस जोराची धडक दिली. यामध्ये दुचाकीवरील दोन्ही भावांचा जागीच मृत्यू झाला. घटना घडल्यानंतर ग्रामीण पोलिसांच्या पथकाने घटनास्थळी भेट देऊन दोघांचे मृतदेह उत्तरीय तपासणीसाठी उदगीरच्या शासकीय रुग्णालयात पाठविले आहेत. दरम्यान, उदगीर ग्रामीण पोलिस ठाण्यात गुन्हा दाखल करण्याची प्रक्रिया सुरु आहे.