येथील शिवसेनेचे उपजिल्हाप्रमुख बालाजी रेड्डी यांची जिल्हाप्रमुखपदी निवड करण्यात आली. त्याबद्दल औरंगाबाद येथील कार्यक्रमात शिवसेनेचे संपर्कप्रमुख चंद्रकांत खैरे यांच्या हस्ते त्यांचा सत्कार करण्यात आला. यावेळी औरंगाबाद शहरप्रमुख विश्वनाथ स्वामी, नगरसेवक वीरभद्र गादगे, महिला आघाडी जिल्हाप्रमुख डॉ. शोभाताई बेजरंगे, माजी नगरसेविका जयश्रीताई उटगे, माजी जिल्हाप्रमुख नामदेव चाळक, उपजिल्हाप्रमुख बाळासाहेब डोंगरे, रामचंद्र अदावळे, शहरप्रमुख भारत सांगवीकर, संतोष रोडगे व्यकंट नलवाड आदींची उपस्थिती होती.
बालाजी रेड्डी यांनी यापूर्वी उपनगराध्यक्ष, शिवसेना तालुकाप्रमुख, उपजिल्हाप्रमुख या पदावर काम केले आहे. उपजिल्हाप्रमुख पदी असताना त्यांनी शिवसेनेचा दबदबा कायम राखण्याचा प्रयत्न केला. शिवसेनेच्या माध्यमातून त्यांनी अनेकांची कामे केली आहेत. यावेळी रेड्डी म्हणाले, जिल्ह्यात पक्षवाढीसाठीचे शिवधनुष्य माझ्यावर सोपविण्यात आले आहे. त्यामुळे जिल्ह्यात शिवसेना गतवैभव आणण्यासाठी माझा प्रयत्न राहणार आहे. (वा.प्र.)