दैठणा येथील नामदेव माधवराव बिरादार या युवा शेतकऱ्याने पारंपरिक पीक पध्दतीस फाटा देत जवळपास एका एकरात दुहेरी फळबाग लागवड केली आहे. त्यामध्ये आठ फुट सरी पध्दतीने पपईची लागवड केली असून,पपईस सहा महिन्यानंतर फळधारणा होते. त्यामुळे पपईच्या आठ सरी मध्ये तीन महिन्यात फळधारणा होणाऱ्या कलिंगडाची लागवड केली आहे.त्यामुळे पपईच्या फळ बागेत कलिंगडाचे आंतरपीक चांगलेच बहरले असून, केवळ ८० दिवसात पावणेदोन लाखाचे उत्पादन नामदेव बिरादार याना मिळाले असून, कलिंगडाचे पहिल्या तीन महिन्याचे उत्पादन घेतल्यानंतर नामदेव बिरादार यानी दुसऱ्यांदा पुन्हा कलिंगडाची लागवड करण्यासाठी तयारी सुरु केली आहे. त्यामुळे कमीत कमी दिवसात दुहेरी फळ लागवड करून जास्तीत जास्त उत्पादन कसे घेता येते याची पाहणी करण्यासाठी अनेक प्रायोगिक तत्त्वावर शेती करणारे शेतकरी भेटी देत आहेत.
८० दिवसात ३८ टनापर्यंत उत्पादन...
पपईस सहा महिन्यानंतर फळधारणा होत असते. त्यामुळे पपईच्या आठ फूट रुंद सरी मध्ये १६ बेड तयार करून नामदेव बिरादार यानी कलिंगडाची लागवड केली. त्यामुळे त्याना केवळ ऐंशी दिवसात ३८ टनापर्यंत कलिंगडाचे उत्पादन मिळाले असल्याने आता पर्यंत पावणेदोन लाखाच्या कलिंगडाची विक्री करण्यात आली असून, कलिंगडाची दुहेरी लागवड करण्याची तयारी त्यानी सुरू केली आहे.
५० गुंठ्यात लाखाचा मिळविला नफा...
नामदेव बिरादार या युवा शेतकऱ्याने सरकारी किंवा खाजगी नौकरीच्या मागे न लागता एका एकरात आठ फुट रुंद सरी तयार करून त्यात पपईची लागवड केली आणि आंतरपीक म्हणून कलिंगडाची लागवड केली त्यासाठी त्याना ७० हजार रूपयाचा लागवड खर्च आला.परंतु पावणेदोन लाखाचे उत्पादन मिळाल्यामुळे केवळ पन्नास गुंठ्यात एक लाखाचा निव्वळ नफा मिळाला आहे.