उदगीर : पोळा सणानिमित्ताने बैल धुण्यासाठी तालुक्यातील चोंडी शिवारातील पाझर तलावावर गेलेल्या एका १६ वर्षीय युवकाचा गुरुवारी बुडून मृत्यू झाला. उदगीर पालिकेच्या अग्निशमन दलाच्या जवानांनी तलावात शोध घेऊन शुक्रवारी सकाळी १० वा.च्या सुमारास मृतदेह पाण्याबाहेर काढला.
विकास रमेश कांबळे (१६, रा.चोंडी, ता.उदगीर) असे मयत युवकाचे नाव आहे. उदगीर तालुक्यातील चोंडी शिवारातील विकास कांबळे हा गुरुवारी सकाळी १० वाजण्याच्या सुमारास गावच्या परिसरातील तलावात बैल धुण्यासाठी गेला होता. तेव्हा त्यास पाण्याचा अंदाज न आल्याने पाण्यात बुडून मृत्यू झाला. ही घटना समजल्यानंतर, तहसीलदार रामेश्वर गोरे हे घटनास्थळी दाखल झाले. त्यांनी उदगीर नगरपालिकेच्या अग्निशमन दलाला पाचारण करून सूचना केल्या. त्यानंतर, गुरुवारी दुपारी १ वा. पासून मृतदेह शोधण्यास सुरुवात झाली. रात्री ७ वा.पर्यंत शोध घेतला, परंतु मृतदेह आढळला नाही. रात्र झाल्याने शोधकाम थांबविण्यात आले.
शुक्रवारी सकाळी ७ वाजता पुन्हा मृतदेह शोधण्यास सुरुवात झाली. सकाळी १० वा. मृतदेह सापडला. येथील सामान्य रुग्णालयात शवविच्छेदन करून, मृतदेह नातेवाइकांच्या ताब्यात देण्यात आला. या प्रकरणी मयताचे नातेवाईक नामदेव कांबळे यांच्या माहितीवरून वाढवणा पोलिसांत आकस्मिक मृत्यूची नोंद करण्यात आली आहे. मृतदेह शोधण्यासाठी उदगीर पालिकेच्या अग्निशमन दलाचे प्रमुख विशाल आल्टे, रत्नदीप पारखे, अश्विन गायकवाड, उमाकांत गंडारे, सुरेश उप्परबावडे, आकाश अंधारे यांनी परिश्रम घेतले.