उदगीर : शहरातील नांदेड रोडवर असलेल्या उदय पेट्रोल पंपाच्या पाठीमागे असलेल्या एका घराच्या मुख्य दरवाजाचे लॉक तोडून आत प्रवेश करून किचनमध्ये असलेल्या कपाटातील चार लाखांची रोकड व १८ ग्रॅम सोन्याचे दागिने असा एकूण ४ लाख ५० हजार रुपयांचा ऐवज अज्ञात चोरट्याने चोरून नेल्याची घटना सोमवारी मध्यरात्रीच्या दरम्यान घडली. याबाबत बुधवारी रात्री उशिरा उदगीर ग्रामीण पोलिस ठाण्यात अज्ञात चोरट्याविरुद्ध गुन्हा दाखल करण्यात आला आहे.
पोलिसांनी सांगितले, फिर्यादी धनाजी विठ्ठलराव राजे यांचे मित्रनगर, उदय पेट्रोल पंपाच्या पाठीमागे घर आहे. सोमवारी मध्यरात्री अज्ञात चोरट्याने मुख्य दरवाजाचे लॉक तोडून आत प्रवेश केला. किचनरूममधील असलेल्या कपाटातील ४ लाखांची रोकड, १० व ५ ग्रॅमची अंगठी, ३ ग्रॅमची नथ असा एकूण ४ लाख ५० हजार रुपयांचा ऐवज लंपास केला. या प्रकरणी उदगीर ग्रामीण पोलिस ठाण्यात धनाजी राजे यांच्या तक्रारीवरून अज्ञात चोरट्याविरुद्ध बुधवारी गुन्हा दाखल करण्यात आला आहे. पुढील तपास पोलिस उपनिरीक्षक बनसोडे करीत आहेत.