लोकमत न्यूज नेटवर्क
कोल्हापूर : येथील राजेंद्र नगरातील महादेव मंदिरानजीक विसाव्यासाठी बसलेल्या युवकांवर मद्यपीने हल्ला केला. मद्यपीने डोक्यात दगड घातल्याने तानाजी बाबू मोरे (३२, रा. इंगळी, ता. हातकणंगले) हे जखमी झाले. याप्रकरणी मारुती सोनवणे (पूर्ण नाव, पत्ता नाही) याच्यावर राजारामपूरी पोलिसांत गुन्हा दाखल झाला. सोमवारी सायंकाळी मोरे हे पत्नी मनीषासोबत विसाव्यासाठी मंदिरानजीक बसले असताना संशयित सोनवणे दारूच्या नशेत तेथे आला. त्याने शेजारी पडलेला दगड उचलून तानाजी मोरे यांच्या डोक्यात घातला. रक्तबंबाळ अवस्थेत त्यांना पत्नीने खासगी रुग्णालयात दाखल केले.
मद्यपीकडून मारहाण
कोल्हापूर : येथील मंगळवार पेठेत एका बिअरबारमध्ये किरकोळ कारणावरून एका अनोळखी व्यक्तीने दारूचा ग्लास मारल्याने युवक जखमी झाला. अमित सदाशिव गवळी (३८ रा. माळी गल्ली, मंगळवार पेठ) असे जखमीचे नाव आहे. बिअरबारमध्ये ज्येष्ठ नागरिकाची चेष्टा करणाऱ्या मद्यपीला गवळी याने जाब विचारला, त्या रागातून अनोळखी मद्यपीने गवळी यांना शिवीगाळ करीत दारूचा ग्लास त्यांच्या कपाळावर व डोळ्यावर मारून जखमी केले. याबाबत जुना राजवाडा पोलिसांत तक्रार दाखल झाली.
दुचाकी चोरी
कोल्हापूर : येथील मेरीवेदर मैदानाशेजारी वारणा कॉलनीत उभी केलेली दुचाकी अज्ञाताने चोरून नेली. अभिजीत अरविंद माने (बागल चौक, शाहुमील) याने या दुचाकी चोरीची तक्रार शाहुपूरी पोलीस ठाण्यात नोंदविली आहे.