कोल्हापूर : नाळे कॉलनीत बंद घराच्या दरवाजाचा कडीकोयंडा तोडून १५ हजारांची चोरी केल्याप्रकरणी जुना राजवाडा पोलिसांनी चोरट्याला अटक केली. संतोष नारायण मजले (२७, रा. सुधारकर जोशीनगर झोपडपट्टी, संभाजीनगर), असे अटक संशयित चोरट्याचे नाव आहे.
पोलिसांनी दिलेली माहिती अशी की, नाळे कॉलनी येथील रुक्मिणी अनिल वाळवेकर (रा. ७/३ सोमराज कॉम्प्लेक्स, पार्वती गार्डन) या दि. २२ ते २८ मार्चदरम्यान आपल्या घराला कुलूप लावून पतीसह माहेरी राहण्यास गेल्या होत्या. त्यावेळी अज्ञात चोरट्याने त्यांच्या घराच्या वरच्या मजल्यावरील मुख्य दरवाजाचा कडीकोयंडा उचकटून आत प्रवेश केला. चोरट्याने त्यांच्या घरातील एलईडी टीव्ही व मोबाइल असा १५ हजार ५०० रुपयांचा ऐवज चोरून नेला. रविवारी घरी परतल्यानंतर हा चोरीचा प्रकार उघडकीस आला. त्यांनी याबाबत जुना राजवाडा पोलीस ठाण्यात चोरीची तक्रार दिली. पोलिसांनी तपास करताना सुधाकर जोशीनगर झोपडपट्टीतील संतोष मजले या तरुणाला संशयावरून अटक करण्यात आली आहे.