कोल्हापूर : अनलॉकनंतर व्यवहार पूर्वपदावर येत असल्याने बेरोजगार नोकरीच्या शोधात विविध ठिकाणी अर्ज करीत आहेत. नोकरीसाठी वर्षभरात येथील स्वयंरोजगार आणि उद्योजकता मार्गदर्शन कार्यालयात ८ हजार ९५७ जणांनी नोंदणी केली आहे. यापैकी ५ हजार ९७३ जणांना खासगी कंपनीत व इतर ठिकाणी नोकरी मिळाली आहे. उर्वरित अजूनही नोकरीच्या शोधात आहेत.
कोरोना आजार नियंत्रणात आणण्यासाठी लॉकडाऊनचा उपाय अवलंबल्याने मंदीचे सावट गडद झाले आहे. परिणामी नव्याने निर्माण होणाऱ्या नोकरीच्या संधी कमी झाल्या आहेत. काही ठिकाणी नोकरकपातही केल्याने बेरोजगारीत पुन्हा भर पडली आहे. यामुळे नोकरीसाठी स्वयंरोजगार, उद्योजकता कार्यालयाकडे नोंदणी करण्याकडे कल वाढला आहे. कोरोनाची दुसरी लाट आल्यानंतर लॉकडाऊन झाल्याने रोजगार नसल्याने आठ महिन्यांत सर्वाधिक मार्च महिन्यात २१९७ जणांनी नोकरीसाठी नोंदणी केली आहे. मात्र त्या महिन्यात केवळ १०८ जणांनाच नोकरी मिळाली आहे. मे महिन्यात नोंदणी केलेल्यांपैकी फक्त एकासच नोकरी मिळाली आहे. गेल्या आठ महिन्याच्या तुलनेत जुलै महिन्यात नोकरीच्या सर्वाधिक संधी निर्माण झाल्याने ३ हजार ३८९ जणांना नोकरी मिळाली. एप्रिल, जुलै, ऑगस्ट वगळता इतर महिन्यात नोंदणीपेक्षा निम्म्याहून कमी लोकांना नोकरी मिळाली आहे.
चौकट
कोणत्या महिन्यात किती नोंदणी?
जानेवारी -१०१४
फेब्रुवारी - १३२२
मार्च -२१९७
एप्रिल -६८४
मे - ३१८
जून - ७२६
जुलै - १४८८
ऑगस्ट - १२०८
कोणत्या वर्षात किती नोंदणी ?
२०१५- ११००७
२०१६-८५७९
२०१७-१७६२०
२०१८-२४७११
२०१९-२१४४३
२०२०-१६४९६
२०२१ ऑगस्टअखेर -८९५७
या वर्षात ५ हजार ९७३ जणांना मिळाला रोजगार
कोरोनामुळे अनेक जणांच्या नोकऱ्या गेल्या आहेत. खासगी क्षेत्रात नव्याने नोकऱ्यांच्या जागा निर्माण होण्यालाही मर्यादा आल्या आहेत. तरीही स्वयंरोजगार आणि उद्योजकता कार्यालयाकडे जानेवारी २०२१ ते ऑगस्टअखेर पर्यंत नोंदवलेल्या ८ हजार ९५७ पैकी ५ हजार ९७३ जणांनाच नोकरी मिळाली आहे.
अनेकांनी पकडली मुंबई पुण्याची वाट
स्वयंरोजगार, उद्योजकता मार्गदर्शन कार्यालयाकडे नोंदणी करूनही नोकरी न मिळालेले बेरोजगार पुणे, मुंबईची वाट धरत आहेत. गावाकडेही भाकरीचा प्रश्न सुटत नसल्याने ते मोठ्या शहरात जाऊन नोकरीचा शोध घेत आहेत. तेथे मिळेल ती नोकरी ते करीत आहेत. बेरोजगारांची संख्या अधिक आणि जागा कमी असे चित्र असल्याने रोजगारीची समस्या भीषण जाणवत आहे.
कोट
नोकरीसाठी आपल्या कार्यालयाकडे या वर्षात ८ हजारपेक्षा अधिक बेरोजगारांनी नोंदणी केली आहे. यातील अनेक जणांना ऑनलाइन रोजगार मेळावा आयोजित करून नोकरीच्या संधी उपलब्ध करून दिल्या आहेत. नोंदणी केलेल्या अधिकाअधिक जणांना नोकरी मिळावी, यासाठी प्रयत्नशील आहे.
संजय माळी, सहायक आयुक्त, स्वयंरोजगार, उद्योजकता विभाग