विद्यार्थ्यांकडून मोबाईलचा ‘बिनधास्त’ वापर

दप्तरात स्थान : शिक्षकांबरोबरच पालकांचीही वाढत आहे डोकेदुखी

ज्योतिप्रसाद सावंत - आजरा -शालेय विद्यार्थ्यांकडून मोबाईलचा बिनधास्त वापर सुरू असून, मोबाईलने विद्यार्थ्यांच्या दप्तरात स्थान मिळविले आहे. केवळ प्रौढांसाठी असणारे संदेश, क्लिप्स, आदी किशोरवयीन मुलेही एकमेकांसोबत शेअर करू लागल्याने हा प्रकार केवळ शिक्षकांचाच नाही, तर पालकांच्यादृष्टीने डोकेदुखी ठरू लागला आहे.गेल्या चार-पाच वर्षांपासून महाविद्यालयीन युवकांपर्यंत मोबाईल पोहोचला होता, पण गेल्या दोन वर्षांमध्ये हायस्कूलमध्ये शिक्षण घेणाऱ्या मुलांपर्यंत मोबाईल पोहोचला आहे. शहरी भागातील मुलांच्या दप्तरात सर्रास मोबाईल दिसू लागले आहेत. बऱ्याच शाळांकडून विद्यार्थ्यांना शालेय आवारात मोबाईल वापरण्यास बंदी घालण्यात आली आहे; परंतु शाळा सुरू असण्याच्या कालावधीत मोबाईल ‘सायलेंट’वर, तर इतरवेळी त्याचा खुला वापर, असा प्रकार आता रूढ होत चालला आहे.सध्या मोबाईलपासून ते अँड्रॉईडपर्यंतचे सर्व प्रकार पालकांना हाताळता येत नाहीत; पण विद्यार्थी बिनधास्तपणे हाताळताना दिसतात. व्हॉटस्अ‍ॅप तसेच फेसबुकवर आता शालेय विद्यार्थ्यांचे फोटोही झळकू लागले आहेत. कॉल करणे आर्थिकदृष्ट्या परवडत नसल्याने ‘मेसेज’वर संवाद साधला जात आहे. या सर्व प्रकारांत अल्पवयीन मुलांकडून मोबाईलचा गैरवापर वाढत चालला आहे, अशा मुलांवर कायद्याच्या चौकटीत राहून कारवाई करताना शिक्षकांवर मर्यादा येत आहेत, तर पालकवर्गास मोबाईलचे पाल्यांचे हट्ट पुरविताना हाल होत आहेत.मोबाईलवरील हिंसक, अश्लील क्लिप्स, गेम्स्, व्हॉटस्अ‍ॅप व संदेशाच्या माध्यमातून शालेय विद्यार्थ्यांमध्ये होणारी चर्चा, संदेशाची देवाणघेवाण हा सर्वच प्रकार विद्यार्थ्यांना गैरमार्गाकडे व अनैतिकतेकडे नेणारा ठरत आहे हे निश्चित. फोटोसाठी वापरशालेय विद्यार्थिनींचे फोटो काढण्यासाठीही विद्यार्थी मोबाईलचा वापर करताना दिसतात. आजरा बसस्थानकावर विद्यार्थिनींचे फोटो काढणे, त्यांच्याशी संपर्क साधण्याचा प्रयत्न करणे, यावरून बऱ्याचवेळा वाद होताना दिसतात.घराघरांत वादमोबाईलची विद्यार्थीवर्गांकडून होणारी मागणी व बऱ्याच पालकांकडून या मागणीला होणारा विरोध यामुळे विद्यार्थी व पालकांमध्ये घराघरांत वाद होताना दिसत आहेत.