कोपार्डे : ग्रामपंचायत निवडणुकीच्या प्रचाराचा बुधवारी शेवटचा दिवस आहे. या पार्श्वभूमीवर अनेक गावांत आपलाच उमेदवार निवडून यावा यासाठी वेगवेगळ्या शक्कल लढविल्या जात आहेत. यात मतदारांना आमिषे दाखविण्याबरोबरच शपथा, भानामतीचे प्रकार मोठ्या प्रमाणात होत असल्याचे समोर आले आहे. कोपार्डे गावात वेगवेगळ्या चार ठिकाणी असे प्रकार समोर आले. करवीर तालुक्यात ५४ ग्रामपंचायतींच्या निवडणुका होत आहेत. यातील २० गावे संवेदनशील आहेत. यात कोपार्डे, कुडित्रे गावांची नावे आघाडीवर आहेत. काल मध्यरात्री कोपार्डे येथे नदीघाट, स्मशानभूमी, गणपतीचे मंदिर व प्राथमिक आरोग्य उपकेंद्र अशा चार ठिकाणी उतारे ठेवण्यात आले आहेत. यात एका ठिकाणी चार नारळ व एक काळ्या कापडात बांधलेला नारळ, तर दुसऱ्या ठिकाणी चप्पल, काळ्या बाहुल्या, लिंबू व काळे बिबे ठेवण्यात आले होते. तर तिसऱ्या ठिकाणी दही, भात, कांदा, लिंबू, तर चौथ्या ठिकाणी सर्व प्रकारचे धान्य व त्यामध्ये कणकीचा दिवा लावण्यात आला होता.
आज सकाळी हे ग्रामस्थांच्या ज्या ज्या ठिकाणी निदर्शनास आले, त्यानंतर याची गावभर चर्चा सुरू झाली. लगेचच याचे फोटो सोशल मीडियावर व्हायरल झाले. यानंतर गावातील नागरिकांनी यावर पाला टाकून पेटवून दिले.
(फोटो) कोपार्डे (ता. करवीर) येथे चार ठिकाणी भानामतीचे केलेले प्रकार.