अंबप फाट्याजवळ दोघांना लुटले --दोघेही सातारा जिल्ह्यातील

चाकूहल्ल्यात एक जखमी : सव्वादोन लाखांचा ऐवज लंपास;

पेठवडगाव : अंबप फाटा (ता. हातकणंगले) येथील रेणुका कला केंद्रात कार्यक्रम पाहण्यास आलेल्या दोघांवर अज्ञातांनी चाकूहल्ला करून त्यांच्याकडील २ लाख ३८ हजाराचा ऐवज लुटला. या हल्ल्यात नेताजी तात्याबा खुडे (वय ४९, रा. कवठे, ता. वाई, जि. सातारा) हे जखमी झाले. ही घटना रविवारी पहाटे दोनच्या सुमारास घडली. याबाबत पेठवडगाव पोलिसांत नोंद झाली आहे. पेठवडगाव पोलिसांनी सांगितले की, पुणे-बंगलोर राष्ट्रीय महामार्गावरील अंबप फाट्यानजीक रेणुका कला केंद्रात गोकुळ अष्टमीचा कार्यक्रम होता. यासाठी कवठे येथून खुडे खासगी वाहन घेऊन चालक मोहन कुचेकरसह आले होते. खुडे हे कार्यक्रम पाहण्यासाठी गेले. तर कुचेकर गाडीत थांबला. (पान ८ वर) रात्री दोनच्या सुमारास दोघे परत जाण्यासाठी कारमधून महामार्गावर आले असता निळ्या रंगाची गाडी आडवी आली. गाडीतील पाच अज्ञातांनी या दोघांना लाथा-बुक्क्यांनी मारहाण केली. चाकूने खुडे यांच्या हातावर वार केला. या दोघांना गाडीत घालून अंबपच्या दिशेने नेले. दरम्यान, गाडीत खुडे यांच्याकडून चोरट्यांनी चेन, हातातील कडे, अंंगठ्या असे सुमारे साडेपंधरा तोळे सोने, रोख साडेतीन हजार, घड्याळ, मोबाईल, आदी २ लाख ३८ हजार ८०० रुपयांचा ऐवज लुटला. चोरट्यांना शोधण्यासाठी परिसरात नाकाबंदी केली आहे. तपास पी.आय. धनंजय जाधव, ए.पी.आय. परशुराम कांबळे, पोलीस उपनिरीक्षक गणेश वारुळे करीत आहेत. चोरटे परिचित ! खुडे यांनी दिलेल्या फिर्यादीत एका चोरट्याच्या तोंडावरील रुमाल ओढला असता तो तोंडओळखीचा असल्याचे म्हटले आहे. चोरटे २५ ते ३० वयोगटातील असून, ते हिंदी भाषेत बोलणारे आहेत. (प्रतिनिधी)