लोकमत न्यूज नेटवर्क
कोल्हापूर : सायबर चौकानजीक भरधाव बुलेटच्या धडकेत दुचाकीवरील दोघे जखमी झाले. माणिक हिंदूराव दाभाडे (वय ४४), त्यांचा मुलगा सार्थक दाभाडे (११, दोघेही रा. महालक्ष्मीनगर, उजळाईवाडी, ता. करवीर), अशी दोघा जखमींची नावे आहेत. दाभाडे हे माळी कॉलनीतून सायबर चौकामार्गे राधाबाई शिंदे स्कूलकडे जाताना ही दुर्घटना घडली. दोघांंच्याही पायाल गंभीर दुखापत झाली. त्यांच्यावर खासगी रुग्णालयात उपचार सुरू आहेत. अपघातानंतर बुलेटचालक पसार झाला. याप्रकरणी अज्ञात बुलेटचालकावर राजारामपुरी पोलिसांत गुन्हा नोंद झाला आहे.
दोन ठिकाणाहून दुचाकींची चोरी
कोल्हापूर : रंकाळा चौपाटी येथे डीमार्टसमोर अक्षय जयसिंग म्हामूलकर (वय ३२, रा. केसरकर गल्ली, लक्षतीर्थ वसाहत) यांनी रस्त्याकडेला आपली दुचाकी उभी केली होती. अज्ञात चोरट्याने लॉक तोडून ती चोरून नेल्याची घटना घडली, तसेच मिरजकर तिकटी येथे घरानजीक सचिन राजाराम कुऱ्हाडे यांनी पार्क केलेली वीस हजार रुपये किमतीची दुचाकी अज्ञाताने बनावट चावीने अथवा लॉक तोडून चोरून नेली. या दोन्ही दुचाकी चोरींची तक्रार जुना राजवाडा पोलीस ठाण्यात नोंद झाली आहे.
पतीच्या हल्ल्यात पत्नी जखमी
कोल्हापूर : घरगुती कारणांवरून चिडून पतीने पत्नीवर कोयत्याने हल्ला करण्याचा प्रयत्न केला. वादातच पत्नीने कोयता हातातून काढून घेण्याचा प्रयत्न केला. त्यामध्ये पत्नी गीतांजली गोरख यादव (वय ४०, रा. हिरवडे दुमाला, ता. करवीर) यांच्या हाताला दुखापत झाली. याबाबत पत्नीच्या तक्रारीवरून पती गोरख पांडुरंग यादव (वय ५०) यांच्यावर करवीर पोलिसांत गुन्हा नोंद झाला आहे.
मारहाणीत महिला जखमी
कोल्हापूर : पाचगाव (ता. करवीर) म्हाडा कॉलनी येथे किरकोळ कारणावरून झालेल्या वादावादीतून काठीने व लाथाबुक्क्यांनी केलेल्या मारहाणीत महिला जखमी झाली. सोना महादेव कोरवी (रा. म्हाडा कॉलनी), असे जखमीचे नाव आहे. सुवर्णा आनंदराव मिठारी यांच्या घरातील टाकीचे पाणी कोरवी यांच्या दारातील रांगोळीवर पडत असल्याने त्याबाबत त्यांनी जाब विचारला असता वादावादी झाली. त्यावरून सुवर्णा मिठारी व त्यांचा मुलगा शिवतेज मिठारी (२२, दोघेही रा. पाचगाव) यांनी काठीने व लाथाबुक्क्यांनी मारहाण केल्याची तक्रार करवीर पोलिसांत नोंद झाली आहे.