गारगोटी - हेदवडे ता. भुदरगड येथील विवाहिता काजल बाळासो कांबके हिने सासू आणि नवऱ्याच्या जाचाला कंटाळून राहत्या घरी गळफास घेऊन आत्महत्या केली. याप्रकरणी आई हौसाबाई चंद्रकांत कांबळे यांनी भुदरगड पोलिसात तक्रार दिली आहे.
अधिक माहिती अशी, टिक्केवाडी ता. भुदरगड येथील हौसाबाई चंद्रकांत कांबळे यांची मुलगी काजल हिचे लग्न हेदवडे ता. भुदरगड येथील बाळासो आनंदा कांबळे याच्याशी जून २०२० मध्ये झाले होते. त्यानंतर ऑक्टोबर २०२० पासून काजल हिला तिचा नवरा बाळासो आनदा कांबळे व सासू मालूबाई आनंदा कांबळे हे दोघे लग्नामध्ये हुंडा का दिला नाही? आता माहेरहून एक लाख रुपये हुंडा घेऊन ये, अशी मागणी करून उपाशी ठेवणे, उपाशीपोटी शेतातील कामे करायला लावणे, अपमानास्पद वागणूक देणे, असे प्रकार सुरू केले. त्यानंतर मारहाण करून शारीरिक व मानसिक छळ करीत होते. त्यांचा छळ असह्य झाल्याने काजल हिने अगतिक होऊन मंगळवारी (दि १८) रोजी संध्याकाळी ६ च्या सुमारास त्यांच्या राहत्या घरी ओढणीने गळ्याला गळफास घेऊन आत्महत्या केली. तिच्या आत्महत्येला सासू मालूबाई, नवरा बाळासो हे जबाबदार असल्याची तक्रार हौसाबाई कांबळे यांनी दिली आहे. दरम्यान, या दोन्ही संशयित आरोपींना भुदरगड पोलिसांनी अटक केली आहे. अधिक तपास पोलीस निरीक्षक संजय मोरे यांच्या मार्गदर्शनाखाली पोलीस करीत आहेत.
लग्नाला अवघे एक वर्ष पूर्ण होण्याआधी लग्नाच्या अकराव्या महिन्यातच काजल हिने आपले आयुष्य संपविले.