सतीश पाटील
शिरोली : महापुराच्या काळात शिरोली पोलिसांनी तब्बल ७५ तास रस्त्यावर उभे राहत सेवा तर दिलीच, शिवाय महापुराच्या पाण्यात बुडणाऱ्या ३० जणांचे जीव वाचवित सद‌‌रक्षणाय खलनिग्रहणाय हे खाकीचे ब्रीदही प्रत्यक्ष सत्यात उतरवले आहे. मुसळधार अतिवृष्टीने कोल्हापूरला झोडपून काढले. पंचगंगा नदीने २२जुलै रोजी रात्री १२ वाजता धोका पातळी ओलांडली. रात्रीभर धडकी भरणारा पाऊस पडल्याने पंचगंगा नदीला पूर आला. २३ जुलै शुक्रवारी सकाळी पुणे-बेंगलोर महामार्गालगत असलेल्या दोन्ही बाजूंच्या सेवा मार्गावर पाणी आल्याने शिरोली पोलिसांनी महामार्गाचा ताबा घेतला. शिरोली पोलीस ठाण्याचे सहाय्यक पोलीस निरीक्षक किरण भोसले यांच्या नेतृत्वाखाली शिरोली पोलीस डोळ्यात तेल घालून येथील वाहतुकीवर लक्ष देत होते. त्यातच पाणीपातळी वाढल्याने महामार्गावर दोन्ही बाजूने पाणी आले. त्यातच तावडे हॉटेलजवळ पोलीस नसल्याने कोल्हापूरकडून शिरोलीकडे येणारी वाहतूक सुरू होती. त्यामुुळे महामार्गावर पाणी येऊनही अनेक वाहनचालक पुराच्या पाण्यातून वाहने घालत होते. मात्र, पाणी अचानक वाढल्याने अनेक दुचाकीस्वार वाहत जात असल्याचे लक्षात आल्याने सहाय्यक पोलीस निरीक्षक किरण भोसले यांनी पोलीस कर्मचारी अविनाश पोवार, सतीश जंगम, महेश अंबी, समीर शेख, प्रशांत काटकर, विजय ठाकूर,जी एम मीरखा, नीलेश कांबळे, विनोद कुरणे,नजीर शेख,महेश घाटगे, रमेश कुंभार, यांनी महामार्गावर मानवी साखळी करत पाण्याच्या प्रवाहातून कोल्हापूरच्या दिशेने जात ३० प्रवाशांना वाचवले. शिरोली पोलिसांच्या या कार्याची दखल घेत जिल्हा पोलीस प्रमुख डॉ. शैलेश बलकवडे यांनी पोलिसांचे अभिनंदन केले आहे.
चौकट :
महामार्गावरील महापुराचे पाणी पूर्णपणे ओसरेपर्यंत शिरोली पोलिसांनी महामार्गावर ठिय्या मांडला होता. महापुरातून बोटीतून येणाऱ्या अनेकांना सुखरूपपणे बाहेर काढण्याचे कामगिरीही शिरोली पोलिसांनी केली. विशेष म्हणजे पुराचे पाणी कमी होत असल्याचे दिसताच महामार्ग सुरू करण्यासाठीची चाचणी घेण्यासाठी सहाय्यक पोलीस निरीक्षक किरण भोसले हे स्वतः जेसीबी मशीन घेऊन पाण्यात उतरले होते.
फोटो : २९ शिरोली पोलीस सत्कार
ओळी १) महापुराच्या काळात शिरोली येथे महामार्गावर तब्बल ७५ तास काम करणारे शिरोलीचे जिगरबाज पोलीस. सोबत जिल्हा पोलीस प्रमुख डॉ. शैलेश बलकवडे आणि सहाय्यक पोलीस निरीक्षक किरण भोसले व टीम.
२९ शिरोली किरण भोसले. २)बोटीतून बाहेर घेताना लहान बाळाला घेताना सहाय्यक पोलीस निरीक्षक किरण भोसले.