शिपाईच चालवतोय दवाखान्याचा कारभार !

‘अडकूर’चा दवाखाना अधिकाऱ्यांविनाच : पशुमालकांची गैरसोय; औषधांचाही तुटवडा

विजयकुमार कांबळे - अडकूर (ता. चंदगड) येथील जनावरांचा दवाखाना पशुवैद्यकीय अधिकाऱ्यांविनाच असून, शिपाईच पाहतोय ‘श्रेणी - १’च्या दवाखान्याचा कारभार. त्यामुळे बिचाऱ्या मुक्या जनावरांना उपचाराविना प्राणास मुकावे लागत आहे. वरिष्ठ अधिकाऱ्यांनी येथे कायमस्वरूपी वैद्यकीय अधिकाऱ्यांची नेमणूक करावी, अशी मागणी होत आहे.चंदगड तालुक्यातील मोठी बाजारपेठ म्हणून अडकूरची ओळख आहे. भाजीपाल्याबरोबरच जनावरांचा बाजारही प्रसिद्ध आहे. म्हणून येथे चंदगड-आजरा-गडहिंग्लजसह कर्नाटकाहूनही व्यापारी मोठ्या संख्येने येतात. जनावरांची खरेदी-विक्रीही मोठ्या प्रमाणात केली जाते. बुधवारचा आठवडा बाजार असल्याने दवाखान्यातही मोठी गर्दी होते. यावेळी गाभण तपासणी, रेडे, बैल व बोकडांचे खच्चीकरण करण्यासाठी गर्दी होेते. तसेच जनावरांना बिल्ले मारणे यासाठी श्रेणी-१च्या वैद्यकीय अधिकाऱ्यांचीच प्रामुख्याने गरज असते. मात्र, वैद्यकीय अधिकारीच उपलब्ध नसल्याने पशुमालकांना ताटकळत बसण्याची वेळ येत आहे.शेतीला पूरक व्यवसाय म्हणून शेतकरी दूध व्यवसायाकडे वळला आहे. भरपूर दूध देणाऱ्या संकरित गायी-म्हशी लाखो रुपये देऊन आणल्या जात आहेत, तसेच नवीन संकरित कोंबड्यांचे पोल्ट्री फार्म व शेळ्या-मेंढ्यांचे मोठ्या प्रमाणात पालनही पहायला मिळत आहे. तसेच शासनाच्या अनेक योजना आहेत.डॉक्टरच वेळेत हजर नसल्याने शासनाच्या विविध योजनेच्या लाभाविनाच वंचित राहण्याची वेळ गोरगरीब पशुपालकांवर आली आहे. असुलभ प्रसूती, मायांग बाहेर येणे तसेच घटसर्प, फऱ्या, लाळखुरकत या संसर्गजन्य साथीच्या आजारांत जनावरांना वेळेत उपचार न झाल्यास प्राण गमवावा लागतो आहे, तर अनेक कारणांनी मृत झालेल्या जनावरांचे शवविच्छेदन करण्यासाठी तालुक्याच्या ठिकाणाहून येणाऱ्या डॉक्टरांची वाट पहावी लागते.एवढेच नव्हे, तर दवाखान्यात खांदमलम तसेच इतर औषधांचा तुटवडाही असल्याचे सांगण्यात येते. डॉक्टरच वेळेत उपलब्ध नसल्याने दवाखान्यालाच उतरती कळा लागली की काय, असे म्हणण्याची वेळ आली आहे. दवाखान्याच्या आवारात गेट नाही, येथे असणारा खोडाही मोडलेल्या स्थितीत असल्याने त्याचीच जखम जनावरांना अधिक होईल का, अशी भीती व्यक्त होत आहे. असे हे किती दिवस चालणार? शेतकऱ्यांनी व पशुपालकांनी कुणाचा आधार घ्यायचा, असा प्रश्न निर्माण होत आहे.दोन वर्षे वैद्यकीय अधिकारीपद रिक्तआमरोळी, अडकूर, उत्साळी, केरवडे, सातवणे पंचक्रोशीसह २२ गावांचा समावेश असलेल्या श्रेणी १ या दवाखान्यात मात्र गेले दीड ते दोन वर्षे वैद्यकीय अधिकारी हे पद रिक्त असून, त्याठिकाणी प्रभारी म्हणून डॉ. एस. पी. पेडणेकर काम पाहत आहेत. मात्र, डॉ. पेडणेकर वेळेत उपलब्ध नसल्याने गायी-म्हशींचे कृत्रिम रेतन वेळेत होत नसून, त्यामुळे वांझ प्रमाण वाढण्याची भीती निर्माण होत आहे.दोन वर्षे वैद्यकीय अधिकारीपद रिक्तआमरोळी, अडकूर, उत्साळी, केरवडे, सातवणे पंचक्रोशीसह २२ गावांचा समावेश असलेल्या श्रेणी १ या दवाखान्यात मात्र गेले दीड ते दोन वर्षे वैद्यकीय अधिकारी हे पद रिक्त असून, त्याठिकाणी प्रभारी म्हणून डॉ. एस. पी. पेडणेकर काम पाहत आहेत. मात्र, डॉ. पेडणेकर वेळेत उपलब्ध नसल्याने गायी-म्हशींचे कृत्रिम रेतन वेळेत होत नसून, त्यामुळे वांझ प्रमाण वाढण्याची भीती निर्माण होत आहे.