राम मगदूम, गडहिंग्लज, जि.कोल्हापूर: गडहिंग्लजचे तरुण उद्योजक संतोष शिंदे यांनी बेडरुममध्ये विषप्राशन व गळे चिरून घेऊन पत्नी व मुलासह राहत्या घरी आपली जीवनयात्रा संपवली. शनिवारी(२४) ही घटना उघडकीस आली.त्यामुळे कोल्हापूरसह सीमाभागात खळबळ उडाली आहे.
महिन्यांपूर्वी त्यांच्यावर बलात्काराचा गुन्हा दाखल झाला आहे. त्यामुळे त्यांना जेलवारी करावी लागली होती. तेव्हापासून ते ताणतणावात होते.जामिनावर जेलमधून बाहेर आल्यानंतर पुन्हा उभारी घेण्याचा प्रयत्न ते करीत होते. परंतु,मानसिक स्वास्थ बिघडल्यामुळेच त्यांनी हे कृत्य केल्याची घटनास्थळी चर्चा आहे.
जिल्हा परिषदेच्या बांधकाम विभागात शिपाई पदावरून निवृत्त झालेल्या संतोषच्या वडिलांचेही अलिकडेच निधन झाले आहे. त्यांनी अगदी लहान वयातच जिद्दीने मोठी भरारी घेतली होती.अर्जुन उद्योग समूहाच्या माध्यमातून त्यांनी खाद्यतेलाचे उत्पादन आणि 'विराज फुडस'च्या बेकरी उत्पादने सुरू केली होती. याशिवाय अत्याधुनिक व्यायामशाळाही सुरू केली होती. मुंबई,कोकणसह कर्नाटकामध्येही त्यांनी उद्योगाचा विस्तारला केला होता.त्यांच्यामागे आई, विवाहित बहिण असा परिवार आहे.