लोकमत न्यूज नेटवर्क
म्हालसवडे : सावर्डे दुमाला (ता. करवीर) येथे ११ वर्षे वयाच्या बालिकेवर बलात्कार करण्याचा प्रकार झाला. या प्रकरणातील संशयित आरोपी नेताजी बापू खाडे (वय ५२) यांनी हिरवडे दुमाला येथील भोगावती नदीशेजारील स्वत:च्या शेतातील शेडमध्ये दोरीने गळफास घेऊन आत्महत्या केली. या घटनेने पंचक्रोशीत खळबळ उडाली आहे. याची नोंद करवीर पोलिसांत झाली आहे.
पोलीस व घटनास्थळावरून मिळालेल्या माहितीनुसार, रविवारी (दि. १०) दुपारी संशयित आरोपी नेताजी खाडे याने खाऊचे आमिष दाखवून ११ वर्षे वयाच्या मुलीला गावच्या मध्यवस्तीत एके ठिकाणी बोलावून बलात्कार केला. दरम्यान मुलीने आरडाओरड करताच त्याने पळ काढला. कुटुंबीयांनी या घटनेची नोंद तत्काळ करवीर पोलिसांत केली. दरम्यान, संशयित आरोपी फरार झाला होता.
हिरवडे दुमाला येथील नदीकाठच्या शेतातील शेडमध्ये मंगळवारी पहाटे आरोपीने गळफास घेतल्याचे नागरिकांच्या लक्षात आले . हिरवडेचे पोलीस पाटील आशिष भाट यांनी या घटनेची नोंद करवीर पोलिसांत केली. पोलिसांनी घटनास्थळी पंचनामा करून उत्तरीय तपासणीसाठी मृतदेह कोल्हापूर येथील शासकीय रुग्णालयात पाठवला. शवविच्छेदन करून सायंकाळी उशिरा गावात अंत्यसंस्कार करण्यात आले . घटनेचे गांभीर्य लक्षात घेऊन कोणताही अनुचित प्रकार घडू नये म्हणून गावात पोलीस बंदोबस्त तैनात करण्यात आला आहे. करवीरचे पोलीस निरीक्षक संदीप कोळेकर व करवीर पोलीस या घटनेचा अधिक तपास करीत आहेत .