काेल्हापूर : लॉकडाऊन, पाऊस आणि अधिकारी व लोकांच्या मानसिकतेमुळे जिल्ह्यात शेतजमिनी मोजणीला ब्रेक लागला असून, प्रलंबित अर्जाचा ढीग भूमिअभिलेखाकडे वाढत चालला आहे. वर्षभरात केवळ ५७४ माेजण्या झाल्या आहेत. तब्बल ५ हजार ३० प्रकरणांना हातच लावलेला नाही. आता पाऊस सुरू झाल्याने आणखी चार महिने मोजणी प्रक्रिया ठप्प राहणार आहे.
बांधाच्या टीचभर हद्दीवरून रक्ताच्या नात्यांमध्ये संघर्ष वाढीस लागल्याच्या पार्श्वभूमीवर मोजणी करून घेण्याकडे लोकांचा कल वाढला आहे. मूळ दुखणे असलेल्या शेतजमिनीच्या माेजणीची किती प्रकरणे प्रलंबित आहेत हे ‘लोकमत’ने जाणून घेतले. त्यातून मोजण्याच ठप्प असल्याचे वास्तव समोर आले. भूमिअभिलेखांकडून कोरोना निर्बंधामुळे दीड वर्षापासून सुरू असलेला लाॅकडाऊन हे प्रमुख कारण दिले आहे. मोजणीसाठी मनुष्यबळ लागते, ते पुरवण्यावर लॉकडाऊनमुळे मर्यादा आल्याने सर्व कामे थांबवण्यात आली. उसाचे क्षेत्र हा मोजणीतील मोठा अडसर आहे. मोजणीचे बिंदू दिसण्यात उसामुळे अडथळे येतात. याशिवाय मोजणीसाठी अर्ज केलेल्यांचे शेजारी प्रतिसाद देत नसल्यानेही मोजणी प्रक्रिया खोळंबून राहत असल्याचे निरीक्षण आहे.
चौकट
जिल्हानिहाय मोजणीचे चित्र
मोजणीसाठी आलेले अर्ज : ५ हजार ६०४
मोजणी पूर्ण झालेले : ५७४
शिल्लक अर्ज : ५ हजार ३०
या महिन्यात आलेले अर्ज : ३९
चौकट
मोजणीचे तालुकानिहाय शिल्लक अर्ज
करवीर : ९७३ , कागल-६७५, शाहूवाडी-५५२, पन्हाळा-५२३, गडहिंग्लज-४७०, हातकणंगले-४४१, चंदगड-३५७, शिरोळ-२८१, आजरा-२७२, राधानगरी व भुदरगड-२०३ व गगनबावडा-८०.
चौकट
९७ पदे रिक्त
भूमिअभिलेखकडे १२ तालुक्यांसाठी प्रत्येकी दोन सर्व्हेअरची नियुक्ती आहे; पण मोजणी प्रकरणांची वाढलेली संख्या पाहता हे मनुष्यबळ अपुरे पडत आहे. आजच्या घडीला भूमिअभिलेखकडे ९७ पदे रिक्त आहेत. मंजूर ३४२ पदे आहेत, त्यापैकी २४५ कार्यरत आहे. यात शिपाई पदाची मंजूर ८७ पैकी ३९ पदे रिक्त आहेत.
पैसे मात्र अतितातडीचे
जमीन माेजणीकरिता प्रतिदोन हेक्टरसाठी साधी १ हजार, तातडीची २ हजार आणि अतितातडीची ३ हजार रुपये अशी वर्गवारीनिहाय फी आकारली जाते, पण प्रत्येक अर्जदारांकडून अतितातडीचेच पैसे भरून घेतले जात असल्याच्या तक्रारी जास्त आहेत. पोटहिस्सा मोजण्यावरूनही अडवणूक होत असल्याच्या तक्रारी आहेत. पैसे भरून घेऊनदेखील मोजणीस येत नसल्याने शेतकरीही वाट पाहून थकला आहे.
प्रतिक्रिया
भूमिअभिलेखकडे नवीन जीपीएस रोव्हर प्रणाली आली आहे, पण त्याचा वापर पावसाळा संपल्यानंतरच सुरू हाेणार असल्याने तोपर्यंत आता जिथे काही वाद, अडचणी नाहीत, अशा शासकीय जमिनीच्या मोजणीचे काम प्राधान्याने हाती घेतले जाणार आहे.
वसंत निकम, अधीक्षक, भूमिअभिलेख, कोल्हापूर
मी गेली आठ महिने झाले शेतजमीन मोजणीसाठी अर्ज दिला आहे. वारंवार पाठपुरावा करूनही अजून मोजणी झालेली नाही. अतिजलदचे पैसे भरूनही हा अनुभव येत आहे.
शंकर देसाई, येणेचवंडी, ता. गडहिंग्लज