अन्यथा महायुतीतून बाहेर!

जिल्ह्यातील चार जागांवर दावा: मुरगूडमधील मेळाव्यात ‘स्वाभिमानी’ची बारा जागांची मागणी

मुरगूड : शेतकऱ्यांसाठीच स्वाभिमानी शेतकरी संघटना महायुतीमध्ये सामिल झाली असून, स्वाभिमानी कोणाच्या गळ्यातील लोढणे बनणार नाही. राज्यामध्ये आम्हाला बारा जागा मिळाल्या नाहीत, तर स्वाभिमानी संघटना महायुतीतून बाहेर पडून किमान ६८ जागांवर उमेदवार उभा करेल, असा इशारा संघटनेचे प्रदेश सचिव राजेंद्र गड्ड्याण्णावार यांनी दिला. जिल्ह्यातील कागल, चंदगड, राधानगरी, भुदरगड व शिरोळ या चार जागांवर संघटनेने आपला दावा सांगितला आहे.मुरगूड (ता. कागल) येथे दत्ता देशमुख सभागृहामध्ये आयोजित मेळाव्यात ते प्रमुख म्हणून बोलत होते. अध्यक्षस्थानी बंडू पाटील होते. संघटनेचे तालुकाध्यक्ष डॉ. बाळासो पाटील यांनी कागल मतदारसंघातून निवडणूक लढवण्याचे जाहीर केले.गड्ड्याण्णावार म्हणाले, शेट्टी यांना कागलमध्ये पाय ठेऊ देणार नाही, असे म्हणणाऱ्यांना जनताच धडा शिकवेल. कागल कुणाची जहागीरदारी नाही, राष्ट्रवादीने साखरसम्राटांना पाठीशी घालण्याचा प्रयत्न केला, म्हणून आमच्या शेतकऱ्यांचा तो शत्रू आहे. लोकसभा निवडणुकीत खासदार शेट्टी यांनीच प्रा. संजय मंडलिक यांना महायुतीतून निवडणूक लढवण्यासाठी भाग पाडले आणि आम्हीच त्यांना मदत केली नाही असा आरोप जर कोण करीत असेल तर ते खपवून घेतले जाणार नाही. जिल्हाध्यक्ष प्रा. जालंदर पाटील म्हणाले, महायुतीतील बड्या पक्षांनी जर स्वाभिमानी शेतकरी संघटनेला सन्मानपूर्वक जागा दिल्या नाहीत, तर आमचे ६८ उमेदवार तयार आहेत. जिल्ह्यातील दहाही मतदारसंघांत संघटनेने जोरदार तयारी केली आहे. मागील विधानसभेला राधानगरीमधून संघटनेला उमेदवारी मिळाली नाही म्हणून त्याचा वचपा काढण्यासाठी कागलमधून संघटनेने संजय घाटगे यांना उमेदवारी दिली. त्यात फायदा कोणाचा आणि तोटा कोणाचा झाला हे सहसंपर्कप्रमुख संजय मंडलिक यांनी ओळखून उमेदवारीबाबत योग्य निर्णय घ्यावेत, असे आवाहन त्यांनी केले.जिल्हाध्यक्ष भगवानराव काटे म्हणाले, राष्ट्रवादी काँग्रेस पक्ष हाच स्वाभिमानी संघटनेचा एक नंबरचा शत्रू असल्याचे सांगून स्वार्थासाठी संघटना कधीच कोणाची मनधरणी करीत नाही. जर सन्मानपूर्वक तोडगा निघाला नाही तर आम्ही महायुतीतून बाहेर पडू. स्वागत व प्रास्ताविक सागर कोंडेकर यांनी केले. यावेळी तालुकाध्यक्ष बाळासो पाटील, नामदेव भराडे, प्रा. अविनाश मगदूम, व्यंकटराव पाटील, कौशिक मुजूमदार, तानाजी चौगुले, ताजानी मगदूम, विश्वनाथ पाटील यांनी मनोगत व्यक्त केले. युवा संघटनेचे तालुकाध्यक्ष शिवाजी कळमकर-यमगेकर यांनी आभार मानले. (प्रतिनिधी)