मुरगूड : मुरगूड (ता. कागल) येथील दिनेश न्यूजपेपर एजन्सीचे मालक, कोल्हापूर जिल्हा स्वाभिमानी वृत्तपत्र विक्रेता संघटनेचे जिल्हा उपाध्यक्ष, बाळासाहेब जमादार विकास सेवा सोसायटी मुरगूडचे माजी व्हाईस चेअरमन आणि माजी सैनिक संघटनेचे विभाग प्रमुख तसेच ‘लोकमत’चे अंक विक्रेते सुभाष बंडा बारदेस्कर (अण्णा) (वय ७०) यांचे हृदयविकाराच्या झटक्याने निधन झाले.
त्यांनी भगतसिंग तरुण मंडळाचे क्रियाशील सभासद, इंदिरा महिला सहकारी ग्राहक संस्थेचे सभासद व सर पिराजीराव घाटगे नागरी सहकारी पतसंस्थेचे माजी सभापती म्हणून ही कार्य केले होते. कडक शिस्त आणि रोखठोक स्वभाव यामुळे बारदेस्कर यांचा वेगळा ठसा मुरगूड शहर परिसरात होता.
गेल्या अनेक वर्षांपासून त्यांनी ‘लोकमत’सह अन्य दैनिकाचे वितरण केले आहे. त्यांच्या निधनाचे वृत्त समजताच शहरासह परिसरातील नागरिकांनी धाव घेऊन अंत्यदर्शन घेतले. यावेळी नगराध्यक्ष राजेखान जमादार, पक्षप्रतोद संदीप कलकुटकी, नगरसेवक अमर सनगर, सुहास खराडे, इचलकरंजीचे माजी नगरसेवक रॉकी फर्नांडिस, बिद्री साखर कारखान्याचे कार्यकारी संचालक किसन चौगुले, संतोष भोसले, सागर भोसले, देवराज बारदेस्कर, संजय भारमल, दत्तात्रय मंडलिक, मुरगूड शहर पत्रकार संघाचे अध्यक्ष अनिल पाटील सचिव राजू चव्हाण यांच्यासह अनेक जण उपस्थित होते. मुरगूड शहर पत्रकार फाउंडेशनच्या वतीने दिवंगत बारदेस्कर यांना श्रद्धांजली वाहण्यात आली. दिवंगत बारदेस्कर यांच्या पश्चात पत्नी, दोन मुले, सुना, मुलगी, नातवंडे असा मोठा परिवार आहे.
चौकट
अण्णांना आगळीवेगळी श्रद्धांजली
पहाटे तीन वाजता ग्रामीण रुग्णालयात बारदेस्कर यांचे हृदयविकाराच्या तीव्र झटक्याने निधन झाले. पहाटे सहापर्यंत सोशल मीडिया व फोनवरून शहरात ही माहिती समजली त्यावेळी आजचा वर्तमानपत्राचा अंक मिळणार नाही, असे अनेकांनी गृहीत धरले होते. पण अंक वाटणाऱ्या मुलांनी अण्णांचे अंत्यदर्शन घेऊन घरोघरी अंक पोहोचवले. महापूर, वादळ वारा किंवा कौटुंबिक कसलीही अडचण आली तरी नेहमी अंक पोहोचवण्यामध्ये अण्णांची तत्परता असायची. यामधून त्यांची कामावरील निष्ठा दिसून येते. आज याच विचाराने अंक वाटून त्यांच्या सहकाऱ्यांनी वेगळीच श्रद्धांजली वाहिली.