कोल्हापूर : नागाळा पार्क येथील नवरंग सोसायटीमधील माझ्या जनसंपर्क कार्यालयाचे उद्घाटन शनिवारी (दि. १६) सायंकाळी सहा वाजता शालेय शिक्षण व क्रीडामंत्री वर्षा गायकवाड यांच्याहस्ते होणार आहे. अध्यक्षस्थानी ग्रामविकासमंत्री हसन मुश्रीफ, तर पालकमंत्री सतेज पाटील, आरोग्य राज्यमंत्री राजेंद्र पाटील यड्रावकर प्रमुख उपस्थित असणार आहेत. या कार्यालयाच्या उद्घाटनानंतर होणाऱ्या ‘शिक्षण परिषद’ सभेत शिक्षण क्षेत्राचे विविध प्रश्न मांडले जाणार आहेत, अशी माहिती आमदार प्रा. जयंत आसगावकर यांनी गुरुवारी पत्रकार परिषदेत दिली.
शिक्षकांच्या विविध प्रश्नांची सोडवणूक करणे, त्यांना भेटण्यासाठी मध्यवर्ती जनसंपर्क कार्यालयाची गरज होती. त्यामुळे नागाळा पार्क येथे कार्यालय सुरू केले आहे. या कार्यालयाच्या उद्घाटनानंतर एस्तर पॅटन हायस्कूलच्या मैदानासमोर ‘शिक्षण परिषद’ होणार आहे. या कार्यक्रमास जिल्ह्यातील खासदार, आमदार, माजी आमदार, जिल्हा परिषद अध्यक्ष, डी. वाय. पाटील विद्यापीठाचे कुलपती संजय डी. पाटील आदींसह शैक्षणिक व्यासपीठ, संघटनांचे पदाधिकारी उपस्थित राहणार असल्याचे आमदार आसगावकर यांनी सांगितले.
यावेळी उदय पाटील, एस. पी. चौगुले, विनोद उत्तेकर आदी उपस्थित होते.