जयसिंगपूर : येत्या महिन्याभरात छत्रपती शिवाजी महाराज यांच्या पुतळ्यासाठी आरक्षित असलेली जागा नगरपालिकेकडे हस्तांतर करून महाराजांच्या अश्वारूढ पुतळ्याचे काम सुरू करू. जागेचा प्रश्न मिटला नाही तर पैसे भरून जागा उपलब्ध करू, अशी ग्वाही आरोग्य राज्यमंत्री डॉ. राजेंद्र पाटील-यड्रावकर यांनी दिली. जयसिंगपूर नगरपरिषद व छत्रपती शिवाजी महाराज उत्सव समिती यांच्या संयुक्त विद्यमाने शुक्रवारी सांगली-कोल्हापूर महामार्गावरील प्राथमिक आरोग्य केंद्राजवळ शिवजयंती उत्सव उत्साहात पार पडला. प्रारंभी नगराध्यक्षा डॉ. नीता माने व उपनगराध्यक्ष संजय पाटील-यड्रावकर यांच्या हस्ते शिवपूजन करण्यात आले.
खासदार धैर्यशील माने म्हणाले, शिवप्रेमींची महाराजांच्या अश्वारूढ पुतळ्याची असणारी इच्छा पूर्ण करण्यासाठी प्रयत्नशील आहे. अक्षय तृतीयेला याच जागेवर महाराजांच्या पुतळ्याचे भूमिपूजन होईल, असा विश्वास व्यक्त केला.
उपनगराध्यक्ष यड्रावकर म्हणाले, येत्या दोन महिन्यांत आरक्षित जागेच्या कायदेशीर बाबींची पूर्तता करून प्रश्न निकालात काढू. नगरसेवक सर्जेराव पवार म्हणाले, १३ मे पर्यंत जागेचा प्रश्न निकाली न निघाल्यास माझ्या नगरसेवक पदाचा राजीनामा नगराध्यक्षांनी जिल्हाधिकाऱ्यांकडे पाठवावा.
याप्रसंगी माजी आमदार उल्हास पाटील, पोलीस उपधीक्षक रामेश्वर वैंजणे, ‘दत्त’चे अध्यक्ष गणपतराव पाटील, सावकर मादनाईक, आदित्य घाटगे, बजरंग खामकर, शंकर नाळे, अभिजित भांदिगिरे, डॉ. सविता पाटील, स्वाती भापकर, अर्चना भोजणे यांच्यासह नगरसेवक, शिवप्रेमी उपस्थित होते.
फोटो - १९०२२०२१-जेएवाय-०५
फोटो ओळ - जयसिंगपूर येथे छत्रपती शिवाजी महाराज यांची जयंती उत्साहात साजरी करण्यात आली. यावेळी नगराध्यक्षा डॉ. नीता माने, उपनगराध्यक्ष संजय पाटील-यड्रावकर यांच्यासह शिवप्रेमी उपस्थित होते.