कोल्हापूर : ‘गोकुळ’च्या निवडणूक प्रचाराच्या दरम्यान आपण संघाची प्रगती आणि त्यातून दूध उत्पादक शेतकऱ्यांचे झालेले कल्याण हेच मुद्दे मांडत आहे. कोणावरही वैयक्तिक टीका केलेली नाही, तरीही ग्रामविकास मंत्री हसन मुश्रीफ यांनी आपल्याबद्दल केलेली टीका ही अनाकलनीय व खेदजनक असल्याचा पलटवार माजी खासदार धनंजय महाडीक यांनी पत्रकातून केला.
‘गोकुळ’च्या निवडणुकीचा प्रचार दोन्ही आघाड्यांकडून सुरू झाला आहे. चंदगड येथे झालेल्या सभेत धनंजय महाडीक यांनी विरोधी आघाडीच्या नेत्यांवर टीका केली होती. यावर धनंजय महाडिक यांनी माझी कळ काढू नये, अन्यथा मी जर तोंड उघडले तर तुम्हाला तोंड दाखवता येणार नाही, असा इशारा मंत्री मुश्रीफ यांनी सोमवारी पत्रकार परिषदेत दिला होता. त्याला महाडीक यांनी प्रतिउत्तर दिले. ‘गोकुळ’च्या निवडणुकीत सत्तारूढ गटाने केलेले काम व प्रगतीचे मुद्दे मांडत आहे. कोणावरही वैयक्तिक टीका केलेली नाही. तरीही ग्रामविकास मंत्री हसन मुश्रीफ यांनी केलेले विधान खेदजनक आहे. गैरसमजुतीतून किंवा कुणीतरी दिशाभूल केल्याने त्यांनी आपल्यावर टीका केली असावी. तीन मंत्री, काही आमदार-खासदार यांनी एकत्र येऊन विरोधी आघाडी तयार केली आहे, याचाच अर्थ ‘गोकुळ’ उत्तम व सक्षमरीत्या चालला आहे, हे सिद्ध होते. हेच मांडण्याचा प्रयत्न केला, तरीही मंत्री मुश्रीफ यांनी आपल्याबद्दल बोलणे हा अनाकलनीय व अक्षम्य प्रकार असल्याचे धनंजय महाडीक यांनी पत्रकात म्हटले आहे.