मुरगूड : सीमा भागातील महत्त्वाचे शहर व बाजारपेठ म्हणून ओळखल्या जाणाऱ्या मुरगूड शहराच्या सुरक्षिततेसाठी आता सशस्त्र कमांडो रात्रभर गस्त घालणार आहेत. त्यांची नेमणूक पोलीस अधिकारी करणार असले तरी त्यांचा मेहनताना पतसंस्था, बँका व लोकसहभागातून देणगी गोळा करून देणार आहेत. जिल्ह्यातील हा पहिलाच उपक्रम असून, पोलीस कर्मचारीही या उपक्रमात अग्रभागी असतील, असा विश्वास सहायक पोलीस निरीक्षक चंद्रकांत मस्के यांनी व्यक्त केला.गेल्या वर्षभरापासून मुरगूड शहरात छोट्या-मोठ्या चोरीपासून दरोडा टाकण्यापर्यंत चोरट्यांची मजल गेली आहे. या पार्श्वभूमीवर मुरगूड पोलीस ठाणे व लक्ष्मी नारायण पतसंस्था यांच्या संयुक्त विद्यमाने लक्ष्मी नारायण सभागृहात सुरक्षा बैठक झाली. उद्योगपती जवाहर शहा अध्यक्षस्थानी होते. शहरातील सर्व पतसंस्था, बँका, व्यापारी व नागरिक यावेळी उपस्थित होते. मस्के म्हणाले, चोरट्यांपासून सुरक्षित राहण्यासाठी नागरिकांनीही खबरदारी घेतली पाहिजे. शहरामध्ये महत्त्वाचे चौक, व्यापारी, बँका, संस्था, आदी ठिकाणी सीसीटीव्ही कॅमेरे बसविण्यात येणार आहेत. पोलीस कर्मचारीही रात्री गस्त घालणार आहेत. बाजारपेठेत सुरक्षेसाठी कमांडोची नियुक्ती केली जाणार असून, रात्री दहा ते पहाटेपर्यंत ते संपूर्ण बाजारपेठेत गस्त घालतील. आमचे कर्मचारी नेहमी त्यांच्या संपर्कात असतील. प्रायोगिक तत्त्वावरील हा उपक्रम यशस्वी झाल्यास संपूर्ण शहरात कमांडोची नेमणूक केली जाईल.शहा म्हणाले, या कमांडोचा खर्च लोकसहभागातून होणार असल्यामुळे प्रत्येक संस्थेने दरमहा किमान एक हजार रुपये देण्याचा ठराव संमत करून घ्यावा. पानटपरीधारक व दुकानदार यांनीही दरमहा ठरावीक रक्कम द्यावी. या पैशाच्या विनियोगासाठी एक समिती स्थापन करण्याचा निर्णय यावेळी घेण्यात आला.विरोधी पक्षनेते किरण गवाणकर म्हणाले, गस्तीच्या नावाखाली तरुणांनी घातलेला हैदोस हा निंदनीय आहे. त्याऐवजी कमांडो नियुक्तीचा निर्णय योग्य आहे. यावेळी उद्योगपती मोहन गुजर, चंद्रकांत माळवदे, मारुती कांबळे, पत्रकार अनिल पाटील यांची भाषणे झाली. पोलीस कर्मचारी बी. बी. मुळीक यांनी प्रास्ताविक केले.
मुरगूडमध्ये सशस्त्र कमांडो घालणार गस्त
By admin | Updated: August 30, 2015 23:13 IST