कोल्हापूर : अमेरिकेत सुरु असलेल्या विश्व पोलीस - फायर खेळ स्पर्धेत कोल्हापूरच्या जयश्री बोरगी हिने धावणे स्पर्धेत तीन सुवर्ण , तर मंदार दिवसे यांने जलतरण स्पर्धेत दोन सुवर्ण, एक रौप्य पदक पटकाविले. त्यामुळे सातासमुद्रापार पुन्हा एकदा कोल्हापूरकरांनी बाजी मारली.
लॉस एन्जेलिस येथे सुरु असलेल्या या स्पर्धेत काल (बुधवारी) जयश्री बोरगी हिने ५ किलोमीटर चालणे स्पर्धेत प्रथम क्रमांक पटकावित सुवर्ण पदकाची कमाई केली. त्यात भर घालत गुरुवारी मध्यरात्री झालेल्या १५०० व ३००० मीटर स्टीपलचेसमध्ये जयश्रीने पुन्हा सुवर्णमय कामगिरी करीत आणखी दोन सुवर्णपदके पटकाविली. त्यामुळे तिच्या खात्यात एकूण ३ सुवर्ण पदके झाली आहेत.
यासह कोल्हापूरचाच आंतरराष्ट्रीय जलतरणपटू व सीमा सुरक्षा दलात अधिकारी असणारा मंदार दिवसे याने उदघाटनादिवशी झालेल्या खुल्या जलतरण स्पर्धेत एक , तर ४०० मीटर फ्रीस्टाईलमध्ये एक सुवर्ण अशी दोन सुवर्ण पदके व ५० बाय ४ रिले मध्ये सांघिक गटात एक रौप्य पदकाची कमाई केली.
मुंबई पोलीस दलाची सोनिया मोकल हिने याच प्रकारात रौप्यपदकाची कमाई केली. तर पुणे पोलिस दलाच्या रविंद्र जगतापने फ्रीस्टाईल ७० किलोगटात सुवर्ण पदक पटकाविले. त्यामुळे एकूणच महाराष्ट्राच्या खेळाडूंचा या स्पर्धेत वरचष्मा राहीला.