राम मगदूम। गडहिंग्लज :
मार्च २०२१ अखेर २६ कोटी १३ लाखांचे उद्दिष्ट असतानाही तब्बल ३४ कोटी ३ लाखांची वीज बिल वसुली करून ‘महावितरण’च्या गडहिंग्लज विभागाने कोल्हापूर परिमंडळात प्रथम क्रमांक पटकाविला. एकूण १३० टक्के इतकी वसुली झाली असून गडहिंग्लज उपविभागातील ५१ गावे थकबाकीमुक्त झाली आहेत.
गेल्यावर्षीच्या मार्च महिन्यापासूनच राज्यात कोरोनाची महामारी सुरू झाली. ती रोखण्यासाठी लॉकडाऊनसह अनेक कडक नियमांची अंमलबजावणी शासनाला करावी लागली. तत्पूर्वी, अनावृष्टी व अतिवृष्टीनंतर आलेल्या कोरोनाच्या संकटामुळे शेतीपंपासह घरगुती, व्यापारी, औद्योगिक व अन्य ग्राहकांकडील वीज बिलांची अब्जावधींची वसुली थकली.
शेतीच्या कर्जाप्रमाणेच वीज बिलांचीदेखील माफी होईल म्हणून अनेक ग्राहकांनी,श तर रोजीरोटी गेल्यामुळे जगणेदेखील मुश्कील झालेल्या काहींनी वीज बिले भरण्याकडे पाठ फिरवली. त्यामुळे महावितरण कंपनी मोठ्या आर्थिक अडचणीत आली. अशा कठीण परिस्थितीत थकीत वीज बिलांची वसुली करणे हे आव्हानात्मक काम होते.
परंतु, गडहिंग्लज उपविभागाचे प्रभारी कार्यकारी अभियंता संजय पोवार यांच्या नेतृत्वाखाली गडहिंग्लज, आजरा व चंदगड तालुक्यांतील त्यांच्या सर्व सहकाऱ्यांनी हे शिवधनुष्य यशस्वीरीत्या पेलले. त्याची नोंद ‘महावितरण’चे अध्यक्ष आणि व्यवस्थापकीय संचालक विजय सिंघल यांनी आवर्जून घेतली. त्यामुळे वीज बिल वसुलीचा गडहिंग्लज पॅटर्न राज्यभर चर्चेत आला आहे.
उपविभागनिहाय वसुलीची टक्केवारी, उद्दिष्ट व प्रत्यक्ष वसुली कंसात कोटीत - गडहिंग्लज विभाग - १३० टक्के, २६.१३ (३४.०३), इचलकरंजी विभाग - ८२ टक्के, ९५.४१ (७८.३८), जयसिंगपूर विभाग - १०३ टक्के, ६८.४५ (७०.१९),
कोल्हापूर ग्रामीण १ - १०७ टक्के, ५८.१५ (६२.००), कोल्हापूर ग्रामीण २ - ९१ टक्के, ७७.४० (७०.४४), कोल्हापूर शहर - ८८ टक्के, ६४.२३ (५६.६३), इस्लामपूर विभाग - ११४ टक्के, ३९.७९ (४५.५४), कवठेमहांकाळ - ७३ टक्के, २६.८९ (१९.५७), सांगली ग्रामीण - ९० टक्के, ३६.६८ (३३.१५), सांगली शहर - ७९ टक्के, ५३.४५ (४२.३९), विटा विभाग -७७ टक्के, ७९.८३ (३८.१४).
----------------------------------
* 'लोकमत'चे आभार..!
'लोकमत'ने सुरुवातीपासूनच घेतलेल्या सकारात्मक भूमिकेमुळे थकीत वीज बिल वसुलीसाठी मोठी मदत झाली. दुर्गम व डोंगरी प्रदेश असलेल्या गडहिंग्लजसारख्या ग्रामीण भागात हे आव्हानात्मक काम होते; परंतु सरपंचापासून आमदारांपर्यंत सर्व लोकप्रतिनिधींचे सहकार्य आणि जनमित्र ते उपकार्यकारी अभियंत्यांपर्यंत सर्वांनी अंत:करणापासून प्रयत्न केले. त्याला वीज ग्राहकांनीदेखील उत्स्फूर्तपणे प्रतिसाद दिला, म्हणूनच हे शक्य झाले. याकामी सहकार्य केलेल्या सर्वांचे आणि विशेषत: 'लोकमत'चे मन:पूर्वक आभार.
- संजय पोवार, प्रभारी कार्यकारी अभियंता, गडहिंग्लज विभाग.
--------------------
या उपक्रमांमुळे मिळाले यश
* कीर्तनाच्या माध्यमातून प्रबोधन.
* थकबाकीमुक्त शेतकरी महिलांचा सन्मान.
* महावितरण आपल्या ‘शिवारी' योजनेची प्रभावी अंमलबजावणी.
* महिला कर्मचाऱ्यांच्या 'दामिनी' पथकाद्वारे वसुली मोहीम.
* आठवडा बाजारात स्टॉल मांडून प्रबोधन.
--------------------
फोटो ओळी : वीज बिल वसुलीमध्ये कोल्हापूर परिमंडळाने प्रथम क्रमांक पटकाविल्याबद्दल मुख्य अभियंता प्रभाकर निर्मळे यांनी खास गडहिंग्लजला येऊन प्रभारी कार्यकारी अभियंता संजय पोवार यांचा स्मृतिचिन्ह व पुष्पगुच्छ देऊन सत्कार केला आणि सर्व सहकाऱ्यांचे विशेष अभिनंदन केले.
क्रमांक : २३०४२०२१-गड-०९