माद्याळ, ता. कागल येथील प्रकाश बंडू भिऊगडे यांनी आपल्या दोन्ही मुलांची लग्ने गडहिंग्लज तालुक्यातील कडगाव येथील जोतिबा श्रीपती नलगे यांच्या दोन्ही मुलींशी ठरवली होती. दरम्यान, संपूर्ण राज्यात १४४ कलम लागू केल्याने लग्न समारंभासाठी ग्रामपंचायत व पोलीस स्टेशनची परवानगी घेऊन पंचवीस लोकांच्या उपस्थित लग्न पार पाडणे गरजेचे होते.
तथापि, भिऊगडे यांनी कोणतीच परवानगी न घेता पंचवीसपेक्षा जास्त लोकांना एकत्रित करून लग्न समारंभ करण्यास सुरुवात केली होती. याबाबत माद्याळमध्ये धूमधडाक्यात लग्न सुरू आहे असा निनावी फोन मुरगूड पोलिसांना आला. त्यानुसार सहायक पोलीस निरीक्षक विकास बडवे, स्वप्निल मोरे, पोलीस सुदर्शन पाटील, ग्रामसेवक कुंभार, पोलीस पाटील मदन संकपाळ, आदींनी माद्याळमध्ये जाऊन ग्रामपंचायत प्रशासनाला बरोबर घेऊन घटनास्थळी भेट दिली. यावेळी नियमांचे उल्लंघन झाल्याचे दिसल्याने पोलिसांनी वर पिता प्रकाश बंडू भिऊगडे, रा माद्याळ, वधू पिता जोतिबा श्रीपती नलगे, रा. कडगाव, ता. गडहिंग्लज, लग्न कार्यात सहकार्य करणारे शरद महादेव भिऊगडे, रा. कडगाव व आनंदा मारुती नागरे, रा. हनीमनाळ, ता गडहिंग्लज या चौघांवर गुन्हा नोंद केला. याबाबत ग्रामपंचायत शिपाई बबन बाळासो गरड यांनी फिर्याद दिली.