गडहिंग्लज : येथील गडहिंग्लज युनायटेड फुटबॉल असोसिएशन व टॅलेंट कौन्सिल ग्लोबल (टीसीजी ) फौंडशनतर्फे आयोजित युनायटेड बेबी लीग फुटबॉल स्पर्धेत शिवराज स्कूलने १० व १२ वर्षे वयोगटात दुहेरी विजेतेपद पटकाविले. एम. आर. हायस्कूलच्या मैदानावर झालेल्या या स्पर्धेत १२ संघांनी सहभाग घेतला. स्पर्धेचे हे १३ वे वर्ष होते.
साधना विद्यालय व गडहिंग्लज हायस्कूलला उपविजेतेपदावर समाधान मानावे लागले. न्यू होरायझनच्या साई बनगे व शिवराजच्या अथर्व बंग्यानावर यांनी स्पर्धावीरचा बहुमान पटकाविला.
१२ वर्षे गटात एकूण २१ साखळी सामने झाले. शिवराज स्कूलने चार सामने जिंकून, तर एक बरोबरीत सोडवून १३ गुणांसह अजिंक्यपद पटकाविले. गडहिंग्लज हायस्कूल व न्यू होरायझन स्कूल यांनी प्रत्येकी ३ सामने जिंकले, तर एक बरोबरीत राखत समान दहा गुण मिळविले. गोलसरासरीवर गडहिंग्लज हायस्कूलने बाजी मारून उपविजेतेपद मिळवले, तर साधना हायस्कूल संघाला ८ गुणांसह तिसऱ्या स्थानावर राहावे लागले.
दहा वर्षांखालील गटात १० सामने झाले. यातही शिवराज स्कूल तीन सामने जिंकून व एक सामना बरोबरीत ठेवत सर्वाधिक १० गुणांसह विजेता ठरला. साधना विद्यालयाने ७ गुणांसह उपविजेतेपद, तर सर्वोदया स्कूलने ६ गुणांसह तृतीय क्रमांक पटकाविला.
दयानंद चौगुले, प्रमोद इंचनाळकर, संजय पाटील यांच्याहस्ते विजेत्या व उपविजेत्या संघांना क्रीडासाहित्य व चषक देऊन गौरविण्यात आले.
स्पर्धा समन्वयक ओंकार घुगरी, ओंकार सुतार यांचा सत्कार केला. यावेळी सुनील चौगुले, संभाजी शिवारे, प्रसाद गवळी, सूरज तेली, ओंकार जाधव, यासीन नदाफ यांच्यासह खेळाडू, क्रीडाशिक्षक आणि पालक उपस्थित होते.
भूपेंद्र कोळी यांनी स्वागत केले. दीपक कुपन्नावर यांनी प्रास्ताविक केले. हुल्लाप्पा सूर्यवंशी यांनी आभार मानले.
--------------------------
* स्पर्धेतील सर्वोत्कृष्ट...
गोलरक्षक - आयन मुल्ला, आदित्य पाटील, बचावपटू - अनमोल तरवाळ, तेजस सावरतकर, मध्यरक्षक- अजिंक्य हातरोटे, ज्ञानेश्वर कावडे, आघाडीपटू- दर्शन तरवाळ, विनायक गोंधळी.
--------------------------
* फोटो ओळी :
गडहिंग्लज येथे आयोजित टीसीजी बेबी लीग फुटबॉल स्पर्धेतील विजेत्या शिवराज स्कूलला दयानंद चौगुले यांच्याहस्ते चषक देऊन गौरविण्यात आले. यावेळी सुनील चौगुले, प्रमोद इंचनाळकर, संजय पाटील आदी उपस्थित होते. (किल्लेदार फोटो)
क्रमांक : ०५०४२०२१-गड-०३