सुहास जाधव
लोकमत न्यूज नेटवर्क
पेठवडगाव : वडगाव परिसरात रुग्णसंख्येने शंभरी पार केली आहे. कोरोनामुळे दोघांचा मृत्यू झाला आहे. मात्र, वडगावला कोविड सेंटर होण्यासाठी युद्धपातळीवर पाठपुरावा करायला हवा. मात्र, याकडे लोकप्रतिनिधींचे दुर्लक्ष होत असून खासगी कोविड सेंटर मात्र मोठ्या प्रमाणात सुरू होण्याच्या हालचाली सुरू आहेत.
कोरोनाच्या पहिल्या लाटेत संवेदनशील दाखवत आमदार, खासदारांनी पाठपुरावा होण्यासाठी प्रयत्न केले. लोकसहभागातून व्यापारी असे असोसिएशन, विजयसिंह यादव प्रतिष्ठान, युवक क्रांती आघाडी अशा अनेकांनी मदतीचा हात दिला.
पालकमंत्री सतेज पाटील याच्या प्रयत्नाने मदत मिळवून दिली.या प्रश्नी तत्कालीन मुख्याधिकारी सुषमा कोल्हे यांनी संवेदनशीलता दाखवत पाठपुरावा केला होता. त्यामुळे हे कोविड सेंटर प्रत्यक्ष साकारले होते.
सध्या पहिल्या लाटेत कोरोना रुग्णांवर लाखाहून अधिक खर्च झाला होता. मात्र, पैसे जावू दे पण जीवनदान मिळाले, अशी भावना झाली होती.
दुसऱ्या लाटेत कोविड रुग्णालये सुरू आहेत. भीतीपोटी साधी लक्षणे असणारे ही रुग्णालयात दाखल होत आहेत. त्यामुळे जागा नाही रुग्णालय हाऊसफुल्ल असल्याचे सांगण्यात येत आहे. यामध्ये सामान्य नागरिक व सेवाक्षेत्रातील अनेक जणांचा कोरोनाबाधित झाले आहेत. त्यामुळे खर्चाचे आकडे ऐकून हतबल झाले आहेत.
यावेळी आणखी पाच कोविड सेंटर सुरू झालेली आहेत. त्यात आणखी चारची भर पडणार आहे पण राज्यात लोकसहभागातून झाकारलेले वडगाव पालिकेचे कोविड सेंटर म्हणून ओळखले जात होते.
येथे मोफत उपचारांबरोबरच जेवण, नाष्टाची सोयही होती. त्यामुळे सामान्यांना आधार ठरलेले हे रुग्णालय होते.
पूर्वी पालिकेने दुरुस्ती केलेल्या धन्वंतरी रुग्णालयास पालिकेने कोविड सेंटर सुरू करण्यास परवानगी दिली आहे. त्यामुळे हक्कांची जागा पालिकेने गमावली आहे तर आता जनरेट्यामुळे नवीन जागा शोधण्यासाठी चाचपणी सुरू आहे. मंगल कार्यालय किंवा डाॅ. प्रवीण हेंद्रे यांचे सध्या बंद असलेले रुग्णालय हे पर्याय पालिकेस खुले आहेत. मात्र, ही सर्व प्रक्रिया पाहता महिन्याहून अधिक कालावधी लागणार आहे.
या पार्श्वभूमीवर झपाट्याने कोरोनाची संख्या वाढत असताना सामान्यांना आधार देणारे रुग्णालय आवश्यक आहे. हे सुरू होण्यासाठी आवश्यक तेवढी गती लोकप्रतिनिधींनी घेतलेली नाही. त्यामुळे सामान्य नागरिक धास्तावले आहेत.