आदिनाथांच्या बृहन्मूर्तीचा महामस्तकाभिषेक लक्ष्मीसेन जैन मठातील सोहळा : क्षेत्रपाल ब्रह्मदेव मूर्तीची झाली प्रतिष्ठापना

 कोल्हापूर : शुक्रवार पेठ येथील स्वस्तिश्री महास्वामी लक्ष्मीसेन जैन मठामध्ये १९६२ मध्ये प्रतिष्ठापित झालेल्या जैन धर्मियांच्या तीर्थंकर मालिकेतील प्रथम तीर्थंकर भगवान आदिनाथ तीर्थंकरांच्या २८ फूट उंच अमृतशीलेतील नयनमनोहर, बृहन्मूर्तीचा ५३ वा महामस्तकाभिषेक महोत्सव अत्यंत मांगल्यपूर्ण विधिवत मोठ्या श्रद्धेने-भक्तिभावनेने आज, रविवारी संपन्न झाला. या महोत्सवाचे अधिनेतृत्व स्वस्तिश्री लक्ष्मीसेन महास्वामीजी यांनी केले. याच महोत्सवासाठी जिनकंची धर्मपीठाचे (तमिळनाडू) परमपूज्य लक्ष्मीसेन महाराज आणि साध्वी आर्यिका सुधर्ममती माताजी यांची पावन उपस्थिती लाभली. सकाळी सहा वाजता जैन मठामध्ये मंगलवाद्य घोषणांनी महोत्सवास आरंभ झाला. सात वाजता ध्वजारोहण झाल्यानंतर भ. चंद्रप्रभ व भ. पार्श्वनाथांचा पंचामृताभिषेक झाला. महाशांतीमंत्र पठणानंतर मठस्थित नवीन मंदिरामध्ये क्षेत्रपाल ब्रह्मदेव मूर्तीची प्रतिष्ठापना झाली. तसेच ९६ बीजाक्षरांतून क्षेत्रपाल विधान धर्मकार्य संपन्न झाले. या मूर्तीप्रतिष्ठा रायबाग निवासी पद्मश्री व अनंतनाथ शांतीनाथ शेट्टी यांनी केली. याचे प्रतिष्ठाचार्य अजित उपाध्ये (कोथळी), तर सहप्रतिष्ठाचार्य जिनदत्त उपाध्ये (शिरटी) यांनी केले. सायंकाळी पाच वाजता भ. १००८ श्री आदिनाथ तीर्थंकर पंचामृत मस्तकाभिषेक संपन्न झाला. सुरुवातीस भगवान आदिनाथ सुवर्णकलश ११ श्रावकांनी ढाळले. त्यानंतर १०८ कलश ढाळण्यात आल्यानंतर पंचामृत अभिषेकास आरंभ झाला. यामध्ये भगवंतांच्या चरणाजवळून पूजा साहित्याची पाद्यपूजा करण्यात आली. खोबर्‍याचा खिस, हरभरा डाळ, साखर, गूळ-तूप, दही व आमरसांनी भगवंतांची पाद्यपूजा विधिवत झाली. यावेळी महापौर सुनीता राऊत, आमदार राजेश क्षीरसागर, शरद इन्स्टिट्यूटचे अनिल बामणे, अजित आजरी, संजय गोपालकर, आदी तसेच शहरातील सर्वच मंदिराचे विश्वस्त तसेच श्रावक-श्राविका उपस्थित होते. त्यानंतर भगवंतांचा महामस्तकाभिषेक धर्ममंत्रोचारांत संगीत-वाद्यांच्या मंगलसुरांत सुवाद्य संपन्न झाला. यामध्ये दुग्धाभिषेक, इक्षु (उसाचा रस), अभिषेक, कलकचूर्ण, कुंकुमाभिषेक, हळद अभिषेक, अष्टगंध, पुष्पवृष्टी झाली. नंतर महाशांतीकलश ढाळून संगीत मंगल आरती झाल्यानंतर महाशांतीकलश ढाळून संगीत मंगल आरती होऊन सांगता झाली. या महोत्सवासाठी प. पू. लक्ष्मीसेन महास्वामी यांच्या मार्गदर्शनाखाली धन्यकुमार जैन, पद्माकर कापसे, राजू उपाध्ये, अभय भिवटे, वसंत आडके, अजित सांगावे, आदींनी संयोजन केले, तर पद्माकर उपाध्ये, सुरेश उपाध्ये, प्रशांत उपाध्ये, प्रमोद उपाध्ये, शशिकांत उपाध्ये, आदी शहरातील पंडितांनी कार्य केले. (प्रतिनिधी)