कोल्हापूर : इंडियन रेल्वे कॅटरिंग अ‍ॅण्ड टुरिझम कॉर्पोरेशनद्वारा कोल्हापूरहून ‘भारत दर्शनयात्रे’चे आयोजन केले आहे. कॉर्पोरेशनच्या पर्यटन विभागाचे सहायक प्रबंधक गुरुराज सोन्ना यांनी ही माहिती दिली. दरम्यान, पर्यटक, प्रवाशांच्या मागणीनुसार कोल्हापूर रेल्वे स्टेशनवर माहिती केंद्र लवकरच स्थापन करण्यात येणार आहे.११ रात्री आणि १२ दिवसांची ही सहल उदयपूर, अजमेर, जयपूर, मथुरा, हरिद्वार, अमृतसर, कटरा येथे नेण्यात येणार आहे. कोल्हापूरहून निघून पुन्हा कोल्हापूर अशा पद्धतीचा यामध्ये प्रवास होणार असून दोनवेळचा नाश्ता व जेवणाचीही सोय करण्यात येणार असल्याचे सांगण्यात आले. अधिक माहितीसाठी रेल्वे स्थानकाशी संपर्क साधण्याचे आवाहन केले आहे.कोल्हापूर रेल्वे स्टेशनवर पर्यटक, प्रवाशांना माहिती देण्यासाठी माहिती केंद्र उभारावे, अशी मागणी गेलीकाही वर्षे करण्यात येत आहे,कारण स्टेशनवर उतरल्यानंतर कोल्हापूरबाबत कोणतीच माहिती मिळत नाही. कोल्हापूरहून अशाच प्रकारे आणखी रेल्वे सहली नेणार असल्याचे यावेळी सांगण्यात आले. यावेळी मोहन शेटे, रवी सरदार, शिवनाथ बियाणी, वासीम सरकवास उपस्थित होते.