जयसिंगपूर : शिरोळ तालुक्यातील घोसरवाड ग्रामपंचायतीच्या सरपंच आरक्षणाबाबत जिल्हाधिकारी यांच्याकडून कार्यवाहीची अपेक्षा सदस्यांना लागून राहिली आहे. अनुसूचित जमाती महिला या प्रवर्गातील सदस्यच नसल्याने सरपंच पदाची जागा सध्या रिक्त आहे. नुकत्याच झालेल्या सरपंच निवडीत केवळ उपसरपंच निवडण्यात आला असून, आता सरपंच कोण होणार, असा प्रश्न सदस्यांसमोर उभा राहिला आहे.
तालुक्यातील ३३ ग्रामपंचायतींच्या निवडणुका नुकत्याच पार पडल्या. या निवडणुकीनंतर सरपंच पदाचे आरक्षण निघाले होते. घोसरवाड सरपंचपदासाठी अनुसूचित जमाती महिला असे आरक्षण निघाले. वास्तविक या ग्रामपंचायतीत सरपंच पदासाठी निघालेल्या या प्रवर्गातील महिला सदस्यच नसल्याने कोणत्याही सदस्याला सरपंच होता येणार नाही, अशी परिस्थिती निर्माण झाली. मात्र, अनुसूचित जमाती या प्रवर्गातील सदस्य असल्याने सरपंच पदाचा मार्ग मोकळा होईल, अशी अपेक्षा होती. मात्र, नुकत्याच झालेल्या सरपंच निवडीवेळी हे पद रिक्त राहिले आहे. त्यामुळे जिल्हाधिकाऱ्यांच्या निर्णयाकडे सर्वच सदस्यांचे लक्ष लागून राहिले आहे.